*ఘనంగా సహజ కవి బమ్మెర పోతన జయంతి వేడుకలు*
జనగామ జిల్లా ప్రతినిధి, సెప్టెంబర్ 20(ప్రజావాణి): సహజ కవి బమ్మెర పోతన జయంతి వేడుకలను బమ్మెర పోతన స్మారక కేంద్రంలో ఆదివారం ఘనంగా నిర్వహించారు. పోతన రచించిన భాగవతం ద్వారా అందించిన సందేశం అందుకోని ముందుకు సాగితే ఆయనకు మనం అందించే ఘన నివాళి అని ముఖ్య అతిథిగా వచ్చిన కొత్త తెలంగాణ చరిత్రబృందం సభ్యులు, అర్చకులు కె.వి.జి.కె.ఆచార్య అన్నారు. ఆత్మీయ అతిథులుగా పాల్గోన్న వ్యవస్థాపక అధ్యక్షులు సౌదామని సాహిత్య సంస్థ (కామారెడ్డి గూడెం) చింత ప్రసాద్ మాట్లాడుతూ పోతన చరిత్రను నేటి తరానికి అందించాలని, పోతన స్మారక కేంద్రాన్ని త్వరగా పూర్తి చేయాలని, పోతన ఆనవాళ్లను పరిరక్షించుకోవాలన్నారు.రామాలయ పూజారి బట్టర్ రామాచార్యులు మాట్లాడుతూ పోతన వారసత్వాన్ని పరిరక్షించాలని, పోతన పద్యాలను నేటి యువతకు, భావితరాలకు అందించేలా అడుగేయాలని పేర్కోన్నారు. వచ్చే సంవత్సరం ఘనంగా పోతన జయంతి నిర్వహిస్తామని, కవి సమ్మేళనం ఏర్పాటు చేసి పోతన వైభవం అందరికి తెలిసెలా ముందుకు సాగుతామని గ్రామ సర్పంచ్ రమ్య ప్రశాంత్, బ్లాక్ కాంగ్రెస్ అధ్యక్షులు రాపాక సత్యనారాయణ పేర్కోన్నారు. మధురమైన పద్యాలను అందించిన పోతన గ్రామంలో మేము ఉండటం మా భాగ్యమని పోతన సాహిత్య కళావేదిక కార్యదర్శి దేవసాని ఉపేందర్, శ్రీ రామదాసు భజన మండలి మండల అధ్యక్షులు సోమ సత్యం పేర్కోన్నారు. పోతన వైభవం అందరికి అందేలా ప్రభుత్వం పోతన జయంతిని అధికారికంగా నిర్వహించాలని పోతన సాహిత్యకళా వేదిక అధ్యక్షులు మాన్యపు భుజేందర్ అన్నారు.
ఈ కార్యక్రమంలో శ్రీ రామదాసు భజన మండలి సభ్యులు, వార్డు సభ్యులు వంగాల భాస్కర్, ఉపాధ్యాయుడు కొంగ సురేష్, యువ నాయకుడు ఉడుత నరేష్, ఉప్పలయ్య, కొమురయ్య, పెంతల బిక్షం, సోమ నారాయణ, మారం వెంకన్న, అంజమ్మ, సోమేశ్వర్ గ్రామపంచాయతీ సిబ్బంది తదితరులు పాల్గొన్నారు.
