*తెలంగాణ విమోచన దినాన్ని అధికారికంగా నిర్వహించాలి పాతూరీ సుధాకర్ రెడ్డి*
మేడ్చల్ సెప్టెంబర్ 15 (నేడు న్యూస్):- 1948 సెప్టెంబర్ 17న హైదరాబాద్ సంస్థానం భారత యూనియన్లో విలీనం అయిన చారిత్రక సందర్భాన్ని పురస్కరించుకుని సెప్టెంబర్ 17ను తెలంగాణ విమోచన దినంగా రాష్ట్ర ప్రభుత్వం అధికారికంగా నిర్వహించాలని తెలంగాణ రాష్ట్ర ముఖ్యమంత్రి రేవంత్ రెడ్డి నేతృత్వంలోని కాంగ్రెస్ ప్రభుత్వాన్ని డిమాండ్ చేస్తున్నాం. 1948లో అప్పటి కేంద్ర హోం మంత్రి సర్దార్ వల్లభ్భాయ్ పటేల్ చొరవతో హైదరాబాద్ సంస్థానం భారత యూనియన్లో విలీనం అయిందని, ఈ పరిణామం తెలంగాణతో పాటు హైదరాబాద్ సంస్థాన పరిధిలోని ప్రజలకు విముక్తికి దారితీసిందని పేర్కొన్నారు. 1945–1948 మధ్యకాలంలో నిజాం పాలన, రజాకార్ల అరాచకాలకు వ్యతిరేకంగా తెలంగాణ ప్రాంతంలో రైతాంగం, సామాన్య ప్రజలు పెద్ద ఎత్తున పోరాటాలు సాగించారని తెలిపారు. కొమురం భీమ్, చాకలి ఐలమ్మ, దొడ్డి కొమురయ్య, రావి నారాయణరెడ్డి తదితరులు తమదైన రీతిలో పోరాటాల్లో కీలక పాత్ర పోషించారని పేర్కొన్నారు. వేలాది మంది ఈ పోరాటాల్లో ప్రాణాలు కోల్పోయారని అన్నారు.
హైదరాబాద్ సంస్థానంలో భాగంగా ఉన్న ప్రస్తుత కర్ణాటక, మహారాష్ట్ర ప్రాంతాల్లో సెప్టెంబర్ 17ను వివిధ రూపాల్లో స్మరించుకుంటున్నప్పటికీ, తెలంగాణలో మాత్రం ఈ చారిత్రక దినోత్సవాన్ని రాష్ట్ర ప్రభుత్వం అధికారికంగా నిర్వహించకపోవడం బాధాకరమని అన్నారు.
తెలంగాణ ఉద్యమ సమయంలో సెప్టెంబర్ 17ను వివిధ రాజకీయ పార్టీలు, సంస్థలు పెద్ద ఎత్తున నిర్వహించాయని గుర్తుచేశారు. తెలంగాణ రాష్ట్రం ఏర్పడిన తర్వాత కూడా ఈ అంశంపై రాజకీయ భిన్నాభిప్రాయాలు కొనసాగుతున్నాయని, చారిత్రక వాస్తవాలను రాజకీయాలకు అతీతంగా గుర్తించాలని కోరారు.
భారతీయ జనతా పార్టీ గత అనేక సంవత్సరాలుగా తెలంగాణ విమోచన దినాన్ని రాష్ట్ర ప్రభుత్వం అధికారికంగా నిర్వహించాలని కోరుతూ ప్రభుత్వ కార్యాలయాల్లో వినతిపత్రాలు సమర్పిస్తూ వస్తోందని తెలిపారు. కేంద్ర ప్రభుత్వం ఆధ్వర్యంలో హైదరాబాద్లో సెప్టెంబర్ 17 కార్యక్రమాలను నిర్వహిస్తున్న విషయాన్ని కూడా ప్రస్తావించారు. అదే సమయంలో, నిజాం–రజాకార్ల అరాచకాలను ఒక మతానికి ఆపాదించకుండా చారిత్రక పాలనా వ్యవస్థ, రజాకార్ సంస్థ చర్యలుగా చూడాలని అన్నారు. అప్పటి అరాచకాలను వ్యతిరేకించిన ముస్లిం వ్యక్తులు కూడా ఉన్నారని, జర్నలిస్టు షోయబుల్లా ఖాన్ వంటి వారు నిజాం పాలనపై విమర్శలు చేస్తూ తమ ప్రాణాలను కోల్పోయారని పేర్కొన్నారు.
తెలంగాణ విమోచన చరిత్రను వక్రీకరించకుండా, రాజకీయాలకు అతీతంగా భవిష్యత్ తరాలకు అందించాల్సిన బాధ్యత ప్రభుత్వంపై ఉందన్నారు. సెప్టెంబర్ 17ను తెలంగాణ విమోచన దినంగా రాష్ట్ర ప్రభుత్వం అధికారికంగా నిర్వహించి, హైదరాబాద్ సంస్థానం భారతదేశంలో విలీనం అయిన చారిత్రక ఘట్టాన్ని ప్రజలకు వివరించాలని డిమాండ్ చేశారు.
