📄 ePaper
5pm
7pm
Friday, November 20, 2026
📄 ePaper
5pm epaper
7pm epaper
Homeఆంధ్రప్రదేశ్ప్రభుత్వ పురుషుల కళాశాలలో ఘనంగా మహాకవి కాళిదాసు జయంతి వేడుకలు

ప్రభుత్వ పురుషుల కళాశాలలో ఘనంగా మహాకవి కాళిదాసు జయంతి వేడుకలు

📰 Generate e-Paper Clip

కడప ప్రజావాణి20 నవంబర్ కడప ప్రభుత్వ పురుషుల కళాశాలలో సంస్కృత శాఖ ఆధ్వర్యంలో మహాకవి కాళిదాసు జయంతి వేడుకలను ఘనంగా నిర్వహించారు.ఈ కార్యక్రమంలో కళాశాల అధ్యాపకులు, ప్రముఖ అతిథులు, విద్యార్థినీ విద్యార్థులు పాల్గొని మహాకవి కాళిదాసు సాహిత్య ప్రతిభను,సంస్కృత భాషకు ఆయన అందించిన అపారమైన సేవలను స్మరించుకున్నారు.ఈ కార్యక్రమానికి కళాశాల ప్రిన్సిపల్ డాక్టర్ జె.వెంకటలక్ష్మి ముఖ్య అతిథిగా హాజరుకాగా, బ్రౌన్ గ్రంథాలయ పరిశీలకులు శ్రీ చింతకుంట శివారెడ్డి విశిష్ట అతిథిగా పాల్గొన్నారు. కార్యక్రమంలో భాగంగా మహాకవి కాళిదాసు జీవిత విశేషాలు, ఆయన రచనల గొప్పతనం,భారతీయ సాహిత్యంపై ఆయన చూపిన ప్రభావం గురించి ప్రసంగించారు.ప్రిన్సిపల్ డాక్టర్ జె. వెంకటలక్ష్మి మాట్లాడుతూ,సంస్కృత సాహిత్యంలో అత్యంత ప్రతిభావంతులైన మహాకవుల్లో కాళిదాసు ఒకరని, ఆయన సాహిత్య సృజన, కవితా వైభవం, ప్రకృతిని వర్ణించే అద్భుతమైన శైలి ప్రపంచ సాహిత్యంలో ప్రత్యేక స్థానాన్ని సంపాదించాయని పేర్కొన్నారు. విద్యార్థులు గొప్ప కవులు, రచయితల జీవితాలను అధ్యయనం చేసి,వారి కృషి,పట్టుదల,సృజనాత్మకతను ఆదర్శంగా తీసుకోవాలని సూచించారు.విద్యతో పాటు సాహిత్యంపై ఆసక్తిని పెంపొందించుకోవడం,భారతీయ సంస్కృతి,సంప్రదాయాలు, భాషా వైభవాన్ని తెలుసుకోవడం ఎంతో అవసరమని తెలిపారు.విశిష్ట అతిథి శ్రీ చింతకుంట శివారెడ్డి మహాకవి కాళిదాసు రచించిన ప్రసిద్ధ గ్రంథాలను విద్యార్థులకు పరిచయం చేస్తూ వాటి సాహిత్య విలువలు,ఇతివృత్తాలు, అంతర్లీన సందేశాలను వివరించారు.అభిజ్ఞాన శాకుంతలం, రఘువంశం, మేఘసందేశం,ఋతుసంహారం, మాళవికాగ్నిమిత్రం,విక్రమోర్వశీయం వంటి గొప్ప రచనల గురించి వివరిస్తూ,ప్రతి రచనలోనూ కాళిదాసు ప్రతిభ, భావ వ్యక్తీకరణ,ప్రకృతి సౌందర్య వర్ణన, మానవ జీవితంలోని భావోద్వేగాలను చిత్రీకరించే నైపుణ్యం ప్రతిబింబిస్తాయని పేర్కొన్నారు.కాళిదాసు రచనలు కేవలం సాహిత్య పరమైన గొప్పతనానికే పరిమితం కాకుండా, మానవ విలువలు,ప్రేమ,అనుబంధాలు, ధర్మం,ప్రకృతి పట్ల మమకారం, జీవన తాత్వికత వంటి అంశాలను కూడా ప్రతిబింబిస్తాయని వివరించారు.విద్యార్థులు ఈ రచనల ద్వారా భాషా పరిజ్ఞానాన్ని పెంపొందించుకోవడంతో పాటు జీవితానికి అవసరమైన విలువలను నేర్చుకోవాలని సూచించారు.భారతీయ సాహిత్య సంపదను అర్థం చేసుకోవడం, ప్రాచీన సాహిత్యాన్ని ఆధునిక తరానికి పరిచయం చేయడం ప్రతి విద్యార్థి బాధ్యతగా భావించాలని తెలిపారు.ఈ జయంతి వేడుకలు విద్యార్థుల్లో సంస్కృత భాష పట్ల ఆసక్తిని పెంపొందించడంతో పాటు మహాకవుల సాహిత్యాన్ని చదవాలనే ప్రేరణ కలిగించాయి.మహాకవి కాళిదాసు వంటి సాహిత్య దిగ్గజాల రచనలు తరతరాలకు మార్గదర్శకంగా నిలుస్తాయని,వారి సాహిత్య వారసత్వాన్ని కాపాడుకోవడం ఎంతో ముఖ్యమని కార్యక్రమంలో వక్తలు పేర్కొన్నారు.ఈ కార్యక్రమంలో కళాశాల వైస్ ప్రిన్సిపల్ డాక్టర్ వెంకటసుబ్బయ్య,సంస్కృత శాఖ అధ్యక్షులు డాక్టర్ టి. వెంకటేశ్వర్లు,కళాశాల అధ్యాపకులు, విద్యార్థినీ విద్యార్థులు పాల్గొన్నారు. మహాకవి కాళిదాసు సాహిత్య వైభవాన్ని గుర్తుచేసుకుంటూ,ఆయన రచనల పట్ల విద్యార్థుల్లో అవగాహన కల్పించడంతో కార్యక్రమం విజయవంతంగా ముగిసింది.

RELATED ARTICLES
- Advertisment -

Most Popular

App Icon

Install PRAJAVAANI App

Add to home screen for faster loading and latest updates.