*అల్లీపూర్ జడ్పీ పాఠశాలలో ఈ-వ్యర్థాల నిర్వహణపై విస్తృత అవగాహన*
*రాయికల్, అక్టోబర్ 28:(ప్రజావాణి)*
రాయికల్ మండలంలోని అల్లీపూర్ జిల్లా పరిషత్ ఉన్నత పాఠశాలలో సోమవారం పర్యావరణ పరిరక్షణలో భాగంగా ఈ-వ్యర్థాల (ఎలక్ట్రానిక్ వేస్ట్) సేకరణ మరియు నిర్వహణపై విస్తృత అవగాహన కార్యక్రమం ఘనంగా జరిగింది. రాష్ట్ర పాఠశాల విద్యా సమగ్ర శిక్షా అభియాన్ ఎస్ పి డి ఆదేశాలు, జిల్లా విద్యాశాఖ సూచనల మేరకు ఈ కార్యక్రమాన్ని పాఠశాల యాజమాన్యం ప్రతిష్టాత్మకంగా నిర్వహించింది.ఈ కార్యక్రమానికి ముఖ్య అతిథిగా జిల్లా విద్యాధికారి కె. రాము హాజరై విద్యార్థులను ఉద్దేశించి మాట్లాడారు. పాత సెల్ ఫోన్లు, ల్యాప్ టాప్ లు, ఛార్జర్లు, బ్యాటరీలు వంటి ఎలక్ట్రానిక్ పరికరాలను ఎక్కడ పడితే అక్కడ పడేయడం వల్ల భూమి, నీరు, గాలి కలుషితమై భవిష్యత్ తరాలకు తీవ్ర ముప్పు వాటిల్లుతుందని ఆయన హెచ్చరించారు. అందుకే ప్రతి విద్యార్థి తమ ఇంట్లో పనికిరాని ఎలక్ట్రానిక్ వస్తువులను సేకరించి పాఠశాలలో ఏర్పాటు చేసిన నలుపు రంగు డబ్బాలో వేయాలని పిలుపునిచ్చారు.ఈ సందర్భంగా పాఠశాల ఆవరణలో నాలుగు రకాల చెత్త డబ్బాలను అధికారులు ప్రదర్శించారు. తడి చెత్త కోసం ఆకుపచ్చ డబ్బా, పొడి చెత్త కోసం నీలం డబ్బా, శుభ్రత వ్యర్థాల కోసం ఎరుపు డబ్బా మరియు విద్యుత్ వ్యర్థాల కోసం నలుపు డబ్బాను ఏర్పాటు చేసి వాటి ప్రాధాన్యతను వివరించారు. అనంతరం విద్యార్థులకు పర్యావరణ పరిరక్షణ, ఈ-వ్యర్థాల నిర్వహణపై క్విజ్ పోటీలు నిర్వహించి విజేతలను అభినందించారు.పాఠశాలలో ఈ-వ్యర్థాల కోసం ప్రత్యేక సమన్వయకర్తగా ఉపాధ్యాయుడు రవికుమార్ ను నియమించామని, ఈకో క్లబ్స్ ఫర్ మిషన్ లైఫ్ పోర్టల్ లో పాఠశాలను నమోదు చేశామని ప్రధానోపాధ్యాయులు కిరణ్ తెలిపారు. ప్రభుత్వ నిబంధనల ప్రకారం సేకరించిన ఈ-వ్యర్థాలను ప్రభుత్వ గుర్తింపు పొందిన M/s Re Sustainability Reldan Refining సంస్థకు మాత్రమే అప్పగిస్తున్నామని స్పష్టం చేశారు. ఈ కార్యక్రమంలో జిల్లా విజ్ఞాన అధికారి రాజశేఖర్, మండల విద్యాధికారి శ్రీపతి రాఘవులు, ఉపాధ్యాయులు మరియు విద్యార్థులు పెద్ద సంఖ్యలో పాల్గొన్నారు.
