జర్నలిస్టులపై పరిగి ఎమ్మెల్యే దురుసు ప్రవర్తన

📰 Generate e-Paper Clip

జర్నలిస్టులపై పరిగి ఎమ్మెల్యే దురుసు ప్రవర్తన: భగ్గుమన్న విలేకరుల సంఘాలు
* ‘డూప్లికేట్ యూనియన్.. కేసీఆర్ సంఘం’ అంటూ రామ్మోహన్ రెడ్డి ఆగ్రహం
* మహాసభల ఆహ్వానం ఇవ్వడానికి వెళ్లిన బహుజన జర్నలిస్టులకు అవమానం
* బేషరతుగా క్షమాపణ చెప్పాలని TUWJ (H-143) డిమాండ్; జిల్లావ్యాప్త ఆందోళనలకు పిలుపు
పరిగి, సెప్టెంబర్ 25:ప్రజా వాణి:
మహాసభల ఆహ్వాన పత్రికను అందజేసేందుకు వెళ్లిన బహుజన జర్నలిస్టులను ఉద్దేశించి పరిగి కాంగ్రెస్ ఎమ్మెల్యే టి. రామ్మోహన్ రెడ్డి తీవ్ర పదజాలంతో విరుచుకుపడటం వికారాబాద్ జిల్లా వ్యాప్తంగా తీవ్ర దుమారం రేపుతోంది. ప్రజా సమస్యలపై నిత్యం గళమెత్తే జర్నలిస్టుల పట్ల ప్రజాప్రతినిధి వ్యవహరించిన తీరుపై జర్నలిస్టు సమాజం తీవ్ర ఆగ్రహం వ్యక్తం చేస్తోంది.
ఆహ్వానం ఇవ్వబోతే ఆగ్రహం:
ఈ నెల 27న (ఆదివారం) వికారాబాద్ జిల్లా కేంద్రంలో ‘తెలంగాణ యూనియన్ ఆఫ్ వర్కింగ్ జర్నలిస్ట్స్’ (TUWJ H-143) జిల్లా మహాసభలు జరగనున్నాయి. ఈ సభలకు సంబంధించిన పోస్టర్ ఆవిష్కరణ నిమిత్తం మర్యాదపూర్వకంగా ఆహ్వాన పత్రికను అందజేసేందుకు బహుజన జర్నలిస్టుల బృందం పరిగి ఎమ్మెల్యే రామ్మోహన్ రెడ్డి వద్దకు వెళ్లింది. అయితే ఆహ్వానాన్ని స్వీకరించేందుకు నిరాకరించిన ఎమ్మెల్యే.. వారిపై తీవ్రస్థాయిలో ఆగ్రహం వ్యక్తం చేశారు. “ఇది డూప్లికేట్ యూనియన్.. కేసీఆర్ యూనియన్” అంటూ విలేకరులను తూలనాడి, తీవ్ర అవమానానికి గురిచేశారని యూనియన్ ప్రతినిధులు తెలిపారు.
జర్నలిస్టులపై రాజకీయ ముద్ర వేయడం దారుణం:
ప్రజాస్వామ్యానికి రక్షణ కవచంగా నిలుస్తూ, అణగారిన వర్గాల సమస్యలను ప్రభుత్వ దృష్టికి తీసుకెళ్లే జర్నలిస్టులపై రాజకీయ పార్టీల రంగు పులమడం ప్రజాప్రతినిధి అహంకారానికి పరాకాష్ట అని యూనియన్ నేతలు మండిపడ్డారు. జర్నలిస్టుల హక్కుల సాధన, సంక్షేమం కోసం పనిచేసే యూనియన్లను రాజకీయ ప్రయోజనాలతో ముడిపెట్టడం గర్హనీయమని పేర్కొన్నారు.
క్షమాపణ చెప్పకుంటే ఉద్యమం తప్పదు: TUWJ (H-143)
జర్నలిస్టుల ఆత్మగౌరవాన్ని దెబ్బతీసేలా వ్యవహరించిన ఎమ్మెల్యే టి. రామ్మోహన్ రెడ్డి తక్షణమే విలేకరులకు, జర్నలిస్ట్ లోకానికి బహిరంగంగా బేషరతు క్షమాపణ చెప్పాలని TUWJ (H-143) నేతలు డిమాండ్ చేశారు. ఎమ్మెల్యే తన వైఖరిపై స్పందించి క్షమాపణ కోరని పక్షంలో జిల్లావ్యాప్తంగా నిరసన ప్రదర్శనలు, ధర్నాలు, కలెక్టరేట్ ముట్టడి వంటి ఆందోళన కార్యక్రమాలు చేపడతామని హెచ్చరించారు. ఈ ఘటనతో పరిగి నియోజకవర్గంతో పాటు ఉమ్మడి జిల్లా వ్యాప్తంగా ఉద్రిక్త వాతావరణం నెలకొంది.