**వరంగల్ అభివృద్ధికి కొత్త రెక్కలు.. మామునూరు ఎయిర్‌పోర్ట్‌పై కీలక సమీక్షలో బీజేపీ జిల్లా అధ్యక్షుడు గంట రవికుమార్!**
వరంగల్ జిల్లా:
వరంగల్ ప్రాంత అభివృద్ధికి ఎంతో కీలకమైన మామునూరు విమానాశ్రయ ప్రాజెక్టుపై మరో కీలక ముందడుగు పడింది. ఎయిర్‌పోర్ట్ అభివృద్ధి, భూసేకరణ మరియు పునరుద్ధరణ పనుల పురోగతిపై ఈరోజు నిర్వహించిన సమీక్ష సమావేశానికి జాతీయ ఎస్టీ కమిషన్ సభ్యులు శ్రీ జాటోతు హుస్సేన్ నాయక్ గారు విచ్చేశారు.
ఈ సందర్భంగా బీజేపీ వరంగల్ జిల్లా అధ్యక్షులు గంట రవికుమార్ గారు, పార్టీ రాష్ట్ర మరియు జిల్లా నాయకులతో కలిసి జాటోతు హుస్సేన్ నాయక్ గారికి మర్యాదపూర్వకంగా ఘన స్వాగతం పలికారు.
అనంతరం ప్రభుత్వ ఉన్నతాధికారులతో నిర్వహించిన సమీక్ష సమావేశంలో మామునూరు ఎయిర్‌పోర్ట్ అభివృద్ధికి సంబంధించిన పలు కీలక అంశాలపై సుదీర్ఘంగా చర్చించారు. ముఖ్యంగా భూసేకరణ ప్రక్రియ, పునరుద్ధరణ చర్యలు, ఇప్పటివరకు చేపట్టిన పనుల పురోగతి, ఇంకా పరిష్కరించాల్సిన అంశాలపై అధికారుల నుంచి వివరాలు తెలుసుకున్నారు.
మామునూరు విమానాశ్రయం అందుబాటులోకి వస్తే వరంగల్ నగరంతో పాటు ఉమ్మడి వరంగల్ జిల్లాల అభివృద్ధికి కొత్త అవకాశాలు ఏర్పడనున్నాయి. విమానయాన సౌకర్యాలు మెరుగుపడటంతో పాటు పారిశ్రామిక రంగం, పర్యాటకం, వ్యాపార కార్యకలాపాలు విస్తరించేందుకు అవకాశం ఉంటుంది. తద్వారా స్థానిక యువతకు ఉపాధి అవకాశాలు పెరిగే అవకాశం కూడా ఉంది.
దశాబ్దాలుగా ఎదురుచూస్తున్న మామునూరు ఎయిర్‌పోర్ట్ కల సాకారమైతే వరంగల్ ప్రాంతం అభివృద్ధిలో మరో కీలక అధ్యాయం ప్రారంభం కానుంది. ఈ ప్రాజెక్టు పనులు వేగవంతమై త్వరితగతిన కార్యరూపం దాల్చాలని ప్రాంత ప్రజలు ఆశాభావం వ్యక్తం చేస్తున్నారు.
మామునూరు ఎయిర్‌పోర్ట్ అభివృద్ధి.. వరంగల్ భవిష్యత్తుకు కొత్త దిశ!
