పోరుమామిళ్లలో ఉధృతమైన వీఆర్ఏల నిరసన: తమ ఉద్యోగాలను రెగ్యులర్ చేయాలని మూడో రోజు ధర్నా

📰 Generate e-Paper Clip

కడప జిల్లా పోరుమామిళ్ల సెప్టెంబర్ 30ప్రజావాణి మండల తహశీల్దార్ (ఎమ్మార్వో) కార్యాలయం వద్ద ఏపీ వీఆర్ఏ జేఏసీ ఆధ్వర్యంలో చేపట్టిన నిరవధిక సమ్మె మూడో రోజుకు చేరి మరింత ఉధృతమైంది. మంగళవారం నాటి నిరసనలో భాగంగా వీఆర్ఏలు తమను తక్షణమే రెగ్యులర్ చేయాలని, ప్రభుత్వ ఉద్యోగులుగా గుర్తించాలని ప్రధానంగా డిమాండ్ చేశారు. కాలపరిమితితో కూడిన ఇంక్రిమెంట్లు, జీతాల పెంపుతో పాటు దశాబ్దాలుగా సేవలందిస్తున్న తమకు ఉద్యోగ భద్రత కల్పించడమే ఏకైక మార్గమని వారు స్పష్టం చేశారు.ఈ సందర్భంగా నిరసన దీక్షలో కూర్చున్న వీఆర్ఏల సంఘం ప్రతినిధులు మాట్లాడుతూ, గ్రామీణ స్థాయిలో ప్రభుత్వానికి, ప్రజలకు మధ్య వారధిగా ఉంటూ రెవెన్యూ వ్యవస్థలో రాత్రింబగళ్లు కష్టపడుతున్న తమను ప్రభుత్వం నిర్లక్ష్యం చేయడం తగదన్నారు. కేవలం తక్కువ గౌరవ వేతనంతో (రూ. 10,500) నిర్బంధ చాలీచాలని బతుకులు ఈడుస్తున్నామని, పొరుగు రాష్ట్రాలలో వీఆర్ఏల వ్యవస్థను మార్చి మెరుగైన జీతాలు ఇస్తున్న విషయాన్ని ఈ సందర్భంగా వారు గుర్తు చేశారు. తమను ప్రభుత్వ ఉద్యోగులుగా క్రమబద్ధీకరించి (రెగ్యులరైజ్ చేసి), పే-స్కేల్ అమలు చేయాలని డిమాండ్ చేశారు.తమ న్యాయమైన డిమాండ్లను ప్రభుత్వం పరిష్కరించే వరకు వెనకడుగు వేసేది లేదని, ఈ సమ్మెను మరింత తీవ్రతరం చేస్తామని నిరసనకారులు హెచ్చరించారు. ఈ కార్యక్రమంలో పోరుమామిళ్ల మండల పరిధిలోని మహిళా మరియు పురుష వీఆర్ఏలు పెద్ద సంఖ్యలో పాల్గొని, ప్రభుత్వానికి వ్యతిరేకంగా నినాదాలు చేస్తూ తమ నిరసనను వ్యక్తం చేశారు.