1200 మీటర్ల మెయిన్ రోడ్డుపై నరకప్రాయమైన ప్రజా ప్రయాణం!
అధికారుల ‘ముడుపుల’ వేటలోనే అనుమతులు ఇచ్చారా? టౌన్ ప్రజల్లో పెల్లుబుకుతున్న ఆగ్రహం!
నేషనల్ హ్యూమన్ రైట్స్ వైస్ ప్రెసిడెంట్ ‘కవలకుంట్ల మధు బాబు’ తీవ్ర ఆగ్రహం.పై అధికారులకు ఫిర్యాదు చేస్తామని హెచ్చరిక!
పోరుమామిళ్ల,జూలై 28 ప్రజావాణి కడప జిల్లాలోని ప్రముఖ వ్యాపార కేంద్రంగా ఎదుగుతున్న పోరుమామిళ్ల మండల కేంద్రంలో అక్రమ కట్టడాల జోరు ప్రజా ప్రాణాల మీదకు తెస్తోంది. రంగసముద్రం మరియు పోరుమామిళ్ల మేజర్ పంచాయతీల పరిధిలోకి వచ్చే సుమారు 1200 మీటర్ల పొడవున్న ప్రధాన రహదారి (మెయిన్ రోడ్డు) ఇప్పుడు అక్రమార్కులకు కామధేనువుగా,సామాన్య ప్రజలకు యమపాశంగా మారింది. రోడ్డుకు ఇరువైపులా ఉండాల్సిన ఫుట్పాత్లు పూర్తిగా అదృశ్యమవడమే కాకుండా,కనీసం డ్రైనేజీ కాల్వలపై కూడా నడవడానికి వీల్లేకుండా దుకాణాలు, కాంక్రీట్ మెట్లు వెలిశాయంటే ఇక్కడి పాలన ఎంత లొసుగులతో సాగుతుందో అర్థం చేసుకోవచ్చు.
నిబంధనలు తుంగలో.డ్రైనేజీలపైనే దుకాణాలు !
నిబంధనల ప్రకారం రోడ్డుకు ఇరువైపులా పాదచారుల భద్రత కోసం ఫుట్పాత్లు నిర్మించాలి.కానీ పోరుమామిళ్ల మెయిన్ రోడ్డుపై పరిస్థితి పూర్తిగా భిన్నంగా ఉంది.డ్రైనేజీ కాల్వల పైనే భారీ ఎత్తున షాపులు వెలిశాయి.వ్యాపారులు తమ దుకాణాల విస్తరణలో భాగంగా కాల్వలను కప్పివేస్తూ శాశ్వత కాంక్రీట్ మెట్లను నిర్మించారు.దీనివల్ల కాల్వలు పూడిక తీయడానికి వీల్లేకుండా పోవడమే కాక, కాలినడకన వెళ్లే సామాన్య ప్రజలు నడవడానికి అడుగు స్థలం కూడా లేకుండా పోయింది. ఫుట్పాత్ హక్కును కోల్పోయిన ప్రజలు విధిలేక ప్రాణాలు గుప్పిట్లో పెట్టుకుని మెయిన్ రోడ్డుపైనే నడవాల్సిన దుస్థితి ఏర్పడింది.
ముడుపుల’ మాయాజాలం.ఆండదండలు ఎవరికి?
ఈ అక్రమ కట్టడాల వెనుక పంచాయతీ,రెవెన్యూ,మరియు ఆర్అండ్బి శాఖల అధికారుల హస్తం ఉందనే ఆరోపణలు బలంగా వినిపిస్తున్నాయి.ప్రభుత్వ స్థలాలను,ప్రజా రహదారులను ఆక్రమించి వ్యాపారాలు చేసుకుంటుంటే,సంబంధిత అధికారులు ఎందుకు మౌనం వహిస్తున్నారనేది మిస్టరీగా మారింది. అక్రమంగా షాపులు పెట్టడానికి, మెట్లు కట్టుకోవడానికి ఈ మూడు శాఖల అధికారులు లోపాయికారీగా భారీ ఎత్తున లంచాలు తీసుకున్నారని పోరుమామిళ్ల టౌన్ ప్రజలు బహిరంగంగానే గుసగుసలాడుకుంటున్నారు. లక్షలాది రూపాయల ముడుపులు చేతులు మారడం వల్లే అధికారులు కళ్లు మూసుకున్నారని స్థానికులు తీవ్ర ఆగ్రహం వ్యక్తం చేస్తున్నారు.
తక్షణమే పై అధికారులకు ఫిర్యాదు చేస్తాం: కవలకుంట్ల మధు బాబు హెచ్చరిక!*
పోరుమామిళ్ల మెయిన్ రోడ్డుపై జరుగుతున్న ఈ దారుణమైన ఆక్రమణలను,అధికారుల నిర్లక్ష్య వైఖరిని నేషనల్ హ్యూమన్ రైట్స్ వైస్ ప్రెసిడెంట్ కవలకుంట్ల మధు బాబు తీవ్రంగా ఖండించారు.లంచాలకు ఆశపడి నిబంధనలను పక్కనబెట్టిన స్థానిక అధికారుల తీరుపై ఆయన తీవ్ర అసంతృప్తి వ్యక్తం చేశారు. ప్రజా హక్కులను కాలరాస్తూ,సామాన్యుల ప్రాణాలను పణంగా పెడుతున్న ఈ వ్యవహారంపై తూతూమంత్రంగా చర్యలు తీసుకుంటే ఊరుకునేది లేదని స్పష్టం చేశారు.ఈ అక్రమ కట్టడాల వెనుక ఉన్న లంచగొండి అధికారుల అసలు రంగు బయటపెడతామని,దీనిపై జిల్లా కలెక్టర్,విజిలెన్స్ అధికారులు మరియు ఆర్ అండ్ బి ఉన్నతాధికారుల వంటి పై అధికారులకు తక్షణమే రాతపూర్వకంగా ఫిర్యాదు చేస్తామని మధు బాబు హెచ్చరించారు.ప్రాథమిక హక్కు అయిన సురక్షితమైన ప్రయాణాన్ని సామాన్యులకు దూరం చేయడం మానవ హక్కుల ఉల్లంఘన కిందకే వస్తుందని, బాధ్యులైన ప్రతి ఒక్కరిపై కఠిన చర్యలు తీసుకునేలా పై అధికారులపై ఒత్తిడి తెస్తామని ఆయన స్పష్టం చేశారు.
భారీ వాహనాల తాకిడి.స్కూల్ పిల్లల విలవిల
నిత్యం వందలాది హెవీ వెహికల్స్ ఈ మెయిన్ రోడ్డు గుండా ప్రయాణిస్తుంటాయి.ఒకవైపు అతివేగంతో వచ్చే భారీ వాహనాలు,మరోవైపు నడవడానికి స్థలం లేక రోడ్డుపైనే వెళ్తున్న పాదచారులతో ఈ 1200 మీటర్ల రోడ్డు నిత్యం మృత్యుకూపంగా మారుతోంది.ఈ మెయిన్ రోడ్డు దాటాలంటేనే పాఠశాల విద్యార్థులు,చిన్న పిల్లలు విలవిలలాడిపోతున్నారు.ఉదయం,సాయంత్రం వేళల్లో ట్రాఫిక్ను నియంత్రించే వారు లేక,రోడ్డు దాటడానికి వీల్లేకుండా ఇరువైపులా ఆక్రమణలు ఉండటంతో విద్యార్థులు తీవ్ర ఇబ్బందులు పడుతున్నారు.ఏ క్షణంలో ఏవచ్చి ఢీకొడుతుందోనని తల్లిదండ్రులు నిత్యం భయాందోళన చెందుతున్నారు.
ఇప్పటికైనా స్పందించేనా.?
డ్రైనేజీలపై ఉన్న అక్రమ దుకాణాలను,మెట్లను తక్షణమే తొలగించి పాదచారులకు ఫుట్పాత్లను అందుబాటులోకి తేవలసిన అవసరం ఎంతైనా ఉంది.ముడుపుల మత్తులో జోగుతున్న అధికారులు మేల్కొని,ఈ 1200 మీటర్ల మెయిన్ రోడ్డుపై తక్షణమే ఆపరేషన్ అక్రమణల తొలగింపు చేపట్టాలని, లేనిపక్షంలో ఉన్నతాధికారుల చర్యలతో పాటు ప్రజా హక్కుల రక్షణ కోసం పెద్ద ఎత్తున పోరాటాలు తప్పవని పట్టణ ప్రజలు మరియు నేషనల్ హ్యూమన్ రైట్స్ వైస్ ప్రెసిడెంట్ ‘కవలకుంట్ల మధు బాబు హెచ్చరిస్తున్నారు.
