చలికాలంలో నిరుపేదలకు అండగా హమ్ సాత్ ఫౌండేషన్
నిరాశ్రయులకు స్వెటర్లు, బ్లాంకెట్లు పంపిణీ.. మానవత్వాన్ని చాటుకున్న హమ్ సాత్ ఫౌండేషన్ చైర్మన్ మహమ్మద్ యాకూబ్ పాషా
జనగామ జిల్లా ప్రతినిధి జె.ఉపేందర్, నవంబర్ 15 (ప్రజావాణి):జనగామ పట్టణంలో చలికాలం నేపథ్యంలో నిరుపేదలు, నిరాశ్రయులకు అండగా నిలిచేందుకు హమ్ సాత్ ఫౌండేషన్ మరోసారి తన సేవా కార్యక్రమాన్ని చేపట్టింది.
ప్రతి సంవత్సరం మాదిరిగానే ఈ ఏడాది కూడా హమ్ సాత్ ఫౌండేషన్ ఆధ్వర్యంలో జనగామ రైల్వే స్టేషన్, బస్టాండ్ ప్రాంగణాల్లో నివసిస్తూ, నిలువ నీడ లేక చలికి ఇబ్బందులు పడుతున్న నిరుపేదలు, అభాగ్యులను గుర్తించి వారికి స్వెటర్లు, బ్లాంకెట్లను పంపిణీ చేశారు.
రాత్రి వేళల్లో చలి తీవ్రత పెరగడంతో రైల్వే స్టేషన్, బస్టాండ్ పరిసరాల్లో ఆశ్రయం పొందుతున్న నిరుపేదలు, వృద్ధులు, నిరాశ్రయులు ఎన్నో ఇబ్బందులు ఎదుర్కొంటున్నారు. ముఖ్యంగా చలిని తట్టుకునేందుకు తగిన దుస్తులు, దుప్పట్లు కూడా లేని వారిని గుర్తించి వారికి అవసరమైన స్వెటర్లు, బ్లాంకెట్లు అందజేయడం అభినందనీయమని పలువురు పేర్కొన్నారు.
సేవే లక్ష్యంగా ముందుకు సాగుతున్న హమ్ సాత్ ఫౌండేషన్ ప్రతి సంవత్సరం చలికాలంలో ఇటువంటి సేవా కార్యక్రమాలు నిర్వహిస్తూ పేదలకు అండగా నిలుస్తోంది. కేవలం మాటలకే పరిమితం కాకుండా, అవసరంలో ఉన్నవారికి ప్రత్యక్షంగా సహాయం అందిస్తూ మానవత్వం, సేవాభావాన్ని చాటుకుంటోంది.
సమాజంలో ఆర్థికంగా వెనుకబడిన వారు, నిరాశ్రయులు, అభాగ్యుల పట్ల ప్రతి ఒక్కరూ మానవతా దృక్పథంతో స్పందించాలని, తమకు చేతనైనంత సహాయం అందించాలని ఈ కార్యక్రమం చాటిచెప్పింది. చలికాలంలో నిరుపేదలకు వెచ్చదనాన్ని అందించిన హమ్ సాత్ ఫౌండేషన్ సేవలను పలువురు అభినందించారు.
