విద్యార్థులకు చట్టాలపై అవగాహన.. సైబర్ నేరాలపై అప్రమత్తత.
కొండాపూర్ ఒక రూపాయి అక్షర కాన్సెప్ట్ పాఠశాలలో జిల్లా న్యాయ సేవాధికార సంస్థ ఆధ్వర్యంలో అవగాహన కార్యక్రమం.
కొండాపూర్, అక్టోబర్ 29(ప్రజావాణి): విద్యార్థులకు చట్టాలపై అవగాహన కల్పించడంతో పాటు, పెరుగుతున్న సైబర్ నేరాల పట్ల అప్రమత్తంగా ఉండేలా చూడాలనే ఉద్దేశంతో గురువారం కొండాపూర్ మండలంలోనీ అక్షర పాఠశాలల్లో ప్రత్యేక అవగాహన కార్యక్రమాన్ని నిర్వహించారు.
ఈ కార్యక్రమానికి జిల్లా న్యాయ సేవాధికార సంస్థకు చెందిన న్యాయమూర్తి శ్రీమతి సౌజన్య ముఖ్య అతిథిగా హాజరై విద్యార్థులకు వివిధ చట్టాలు, వాటి ప్రాధాన్యత, సైబర్ నేరాల గురించి వివరించారు. ప్రస్తుత డిజిటల్ యుగంలో మొబైల్ ఫోన్లు, ఇంటర్నెట్ వినియోగం పెరుగుతున్న నేపథ్యంలో విద్యార్థులు సైబర్ నేరాల పట్ల జాగ్రత్తగా ఉండాలని సూచించారు.
ఆన్‌లైన్ మోసాలు, తెలియని లింకులను క్లిక్ చేయడం, వ్యక్తిగత సమాచారం ఇతరులతో పంచుకోవడం, సోషల్ మీడియా వినియోగంలో తీసుకోవాల్సిన జాగ్రత్తలు వంటి అంశాలపై విద్యార్థులకు అవగాహన కల్పించారు. సైబర్ నేరగాళ్ల వలలో చిక్కుకోకుండా అప్రమత్తంగా ఉండాలని, అనుమానాస్పద కార్యకలాపాలు ఎదురైతే వెంటనే తల్లిదండ్రులు, ఉపాధ్యాయులు లేదా పోలీసుల దృష్టికి తీసుకెళ్లాలని సూచించారు.
అలాగే ప్రతి విద్యార్థి చట్టాలపై ప్రాథమిక అవగాహన కలిగి ఉండాలని, హక్కులతో పాటు బాధ్యతలను కూడా గుర్తించాలని వివరించారు. చట్టాలను గౌరవిస్తూ, క్రమశిక్షణతో వ్యవహరిస్తూ బాధ్యతాయుతమైన పౌరులుగా ఎదగాలని విద్యార్థులకు సూచించారు.
ఈ కార్యక్రమంలో కొండాపూర్ మండల విద్యాశాఖ అధికారి ఎలిజబెత్, పాఠశాల ప్రధానోపాధ్యాయుడు రాజయ్య పాల్గొన్నారు. విద్యార్థులకు చట్టాలపై అవగాహన కల్పించడం, సైబర్ నేరాల నుంచి రక్షణ పొందే మార్గాలను తెలియజేయడం ఈ కార్యక్రమం ప్రధాన ఉద్దేశమని తెలిపారు.
విద్యార్థి దశ నుంచే చట్టాలపై అవగాహన పెంపొందించుకోవడం ద్వారా సురక్షితమైన, బాధ్యతాయుతమైన సమాజ నిర్మాణానికి ప్రతి ఒక్కరూ తోడ్పడాలని ఈ కార్యక్రమం ద్వారా సందేశం ఇచ్చారు.
