*కిష్టాపూర్‌లో పట్టభద్రుల ఓటరు నమోదు కార్యక్రమం*
*అర్హులైన పట్టభద్రులందరూ ఓటరుగా నమోదు చేసుకోవాలి*
*మాజీ కౌన్సిలర్ తుడుం గణేష్ పిలుపు*
మేడ్చల్, అక్టోబర్ 26 (ప్రజా వాణి
):
మేడ్చల్ సర్కిల్ పరిధిలోని పూడూరు–కిష్టాపూర్ డివిజన్‌లో భాగమైన కిష్టాపూర్ గ్రామంలో మాజీ కౌన్సిలర్ తుడుం గణేష్ ఆధ్వర్యంలో పట్టభద్రుల ఓటరు నమోదు కార్యక్రమాన్ని నిర్వహించారు. పట్టభద్రుల ఎమ్మెల్సీ ఎన్నికల్లో అర్హులైన ప్రతి ఒక్కరూ తమ ఓటు హక్కును వినియోగించుకునేలా ఓటరు జాబితాలో పేర్లు నమోదు చేసుకోవాలని ఈ సందర్భంగా ఆయన సూచించారు. ఈ సందర్భంగా తుడుం గణేష్ మాట్లాడుతూ ప్రజాస్వామ్య వ్యవస్థలో ఓటు హక్కు అత్యంత కీలకమని, ప్రజాస్వామ్యాన్ని బలోపేతం చేయడంలో ప్రతి ఓటరుకు బాధ్యత ఉంటుందని పేర్కొన్నారు. ముఖ్యంగా పట్టభద్రుల ఎమ్మెల్సీ ఎన్నికల్లో ఓటు హక్కు వినియోగించుకోవాలంటే అర్హులైన పట్టభద్రులు ముందుగానే ఓటరుగా నమోదు చేసుకోవడం అవసరమని వివరించారు. డిగ్రీ, పీజీ తదితర ఉన్నత విద్యను పూర్తి చేసిన పట్టభద్రులు నమోదు ప్రక్రియపై అవగాహన పెంచుకొని, అవసరమైన వివరాలు సమర్పించి తమ పేర్లను ఓటరు జాబితాలో చేర్చుకోవాలని కోరారు. గ్రామంలోని అర్హులైన పట్టభద్రులందరికీ ఓటరు నమోదు ప్రాధాన్యతను వివరించడంతోపాటు, నమోదు ప్రక్రియపై అవగాహన కల్పించారు. కేవలం విద్యను అభ్యసించడమే కాకుండా ప్రజాస్వామ్య వ్యవస్థలో భాగస్వాములై తమ అభిప్రాయాన్ని ఓటు ద్వారా తెలియజేయడం కూడా విద్యావంతుల బాధ్యత అని పేర్కొన్నారు. అర్హత ఉన్నప్పటికీ ఓటరు జాబితాలో పేరు నమోదు చేసుకోకపోతే ఎన్నికల సమయంలో ఓటు హక్కును వినియోగించుకునే అవకాశం కోల్పోయే పరిస్థితి ఉంటుందని, అందువల్ల పట్టభద్రులంతా నిర్లక్ష్యం చేయకుండా నమోదు ప్రక్రియను పూర్తి చేసుకోవాలని సూచించారు. పట్టభద్రుల ఎమ్మెల్సీ ఎన్నికల్లో ఓటు హక్కు ప్రాధాన్యతను గుర్తించి గ్రామంలోని యువత, ఉన్నత విద్యను పూర్తి చేసిన వారు, ఇతర అర్హులైన పట్టభద్రులు ఈ అవకాశాన్ని సద్వినియోగం చేసుకోవాలని తుడుం గణేష్ పిలుపునిచ్చారు. ఓటరు నమోదు విషయంలో అవసరమైన అవగాహన కల్పించేందుకు ప్రతి ఒక్కరూ ముందుకు రావాలని కోరారు.
ఈ కార్యక్రమంలో బీఆర్ఎస్ పార్టీ నాయకులు డి. నరేష్, మంత్రి కుమార్, డి. సురేష్, సూరిబాబు, సాయి గౌడ్, సుధాకర్‌తో పాటు గ్రామస్తులు గణేష్, విష్ణు తదితరులు పాల్గొన్నారు.
