వరకట్న వేధింపులకు మహిళ బలి
భర్త అరెస్టు
జైపూర్,ఆగస్టు 15,ప్రజావాణి:
వరకట్న వేధింపులు తాళలేక ఓ వివాహిత ఆత్మహత్యకు పాల్పడిన సంఘటన జైపూర్ మండలంలో చోటుచేసుకుంది. ఈ కేసులో మృతురాలి భర్తను పోలీసులు శనివారం అరెస్టు చేశారు.పోలీసులు తెలిపిన వివరాల ప్రకారం.. మిట్టపల్లి గ్రామానికి చెందిన గుర్ర లక్ష్మి (28)కి సురేష్‌తో వివాహమైంది. పెళ్లి సమయంలో రూ. 3 లక్షలు కట్నంగా ఇచ్చారు. అయితే, భర్త సురేష్ ఆన్‌లైన్ బెట్టింగ్‌లకు అలవాటుపడి ఎలాంటి పనీ చేయకుండా జల్సాలు తిరిగేవాడు. పైగా అదనపు కట్నం తీసుకురావాలంటూ లక్ష్మిని మానసికంగా, శారీరకంగా వేధించడం మొదలుపెట్టాడు. భర్త వేధింపులు రోజురోజుకూ ఎక్కువ కావడంతో మనస్తాపం చెందిన లక్ష్మి ఇంట్లో ఉరివేసుకుని ఆత్మహత్య చేసుకుంది.
మృతురాలి తల్లి కుందే కమల ఇచ్చిన ఫిర్యాదు మేరకు పోలీసులు కేసు నమోదు చేసుకుని దర్యాప్తు చేపట్టారు. శనివారం సాయంత్రం ఇందారం స్టేజి వద్ద నిందితుడు సురేష్‌ను అదుపులోకి తీసుకున్నట్లు, అతడిని కోర్టులో హాజరుపరచనున్నట్లు పోలీసులు వెల్లడించారు.
