**ఐదేళ్లుగా పండ్ల మార్కెట్‌కు మోక్షం లేదా? బీఆర్ఎస్ కూల్చింది.. కాంగ్రెస్ పట్టించుకోలేదు! బీజేపీ ఫైర్ 🔥**
వరంగల్ | 14-11-2026
ఐదేళ్లుగా హామీలు మారుతున్నాయి.. ప్రభుత్వాలు మారుతున్నాయి.. కానీ వరంగల్ పండ్ల మార్కెట్ వ్యాపారుల కష్టాలు మాత్రం తీరడం లేదు. గత బీఆర్ఎస్ ప్రభుత్వం పాత మార్కెట్‌ను కూల్చివేస్తే, అధికారంలోకి వచ్చిన కాంగ్రెస్ ప్రభుత్వం కొత్త మార్కెట్ నిర్మాణాన్ని పూర్తి చేయకుండా నిర్లక్ష్యం చేస్తోందని బీజేపీ వరంగల్ జిల్లా అధ్యక్షులు గంట రవికుమార్ తీవ్రస్థాయిలో విమర్శించారు. రూ.24 కోట్లతో చేపట్టిన మార్కెట్ నిర్మాణం ఎప్పుడు పూర్తిచేస్తారని ప్రభుత్వాన్ని ప్రశ్నించారు. రైతులు, వ్యాపారులకు న్యాయం చేయాలని డిమాండ్ చేశారు.
పూర్తి వివరాల్లోకి వెళ్తే..
వరంగల్ నగరంలోని లక్ష్మీపురం పండ్ల మార్కెట్ సమస్యలపై బీజేపీ గళమెత్తింది. బీజేపీ వరంగల్ జిల్లా అధ్యక్షులు గంట రవికుమార్ పార్టీ నాయకులు, పండ్ల మార్కెట్ వ్యాపారులు, రైతులతో కలిసి మార్కెట్‌ను సందర్శించారు. అక్కడి పరిస్థితులను పరిశీలించి వ్యాపారులు, రైతులు ఎదుర్కొంటున్న సమస్యలను నేరుగా అడిగి తెలుసుకున్నారు. అనంతరం నిర్వహించిన మీడియా సమావేశంలో ప్రభుత్వాల నిర్లక్ష్య వైఖరిపై తీవ్రస్థాయిలో విమర్శలు గుప్పించారు.
ఐదేళ్లుగా మారని వ్యాపారుల పరిస్థితి..
గత ఐదేళ్లుగా ప్రభుత్వాలు మారుతున్నా పండ్ల మార్కెట్ వ్యాపారుల జీవితాల్లో మాత్రం ఎలాంటి మార్పు రావడం లేదని గంట రవికుమార్ అన్నారు. గత బీఆర్ఎస్ ప్రభుత్వం అభివృద్ధి పేరుతో ఉన్న పాత పండ్ల మార్కెట్‌ను కూల్చివేసి కొత్త మార్కెట్ నిర్మిస్తామని హామీ ఇచ్చిందని, కానీ నిర్మాణాన్ని పూర్తిచేయకుండా మధ్యలోనే వదిలేసిందని విమర్శించారు.
రూ.24 కోట్ల మార్కెట్ నిర్మాణం ఎప్పుడు పూర్తి చేస్తారు?
వరంగల్ ఆర్టీసీ బస్ స్టేషన్ సమీపంలో 4.16 ఎకరాల విస్తీర్ణంలో సుమారు రూ.24 కోట్ల వ్యయంతో సమీకృత వెజ్ అండ్ నాన్‌వెజ్ మార్కెట్ నిర్మాణ పనులు చేపట్టారని తెలిపారు. ఇందులో పండ్ల మార్కెట్ కోసం ప్రత్యేకంగా 85 గదులు నిర్మిస్తామని హామీ ఇచ్చారని గుర్తుచేశారు. అయితే ఇప్పటివరకు పనులు పూర్తికాకపోవడం పట్ల ఆగ్రహం వ్యక్తం చేశారు.
కాంగ్రెస్ ప్రభుత్వంపై విమర్శలు..
ప్రస్తుత కాంగ్రెస్ ప్రభుత్వం అధికారంలోకి వచ్చి దాదాపు మూడేళ్లు కావస్తున్నా అసంపూర్తిగా ఉన్న మార్కెట్ నిర్మాణ పనులను పూర్తి చేయడంలో ఎలాంటి పురోగతి చూపించడం లేదని గంట రవికుమార్ ఆరోపించారు. కాంట్రాక్టర్లకు బిల్లులు సకాలంలో చెల్లించకపోవడంతో నిర్మాణ పనులు నిలిచిపోయాయని విమర్శించారు.
ఎండకు ఎండుతూ.. వానకు తడుస్తూ వ్యాపారాలు!
మార్కెట్‌లో సరైన షెడ్లు, కనీస మౌలిక సదుపాయాలు లేక వ్యాపారులు తీవ్ర ఇబ్బందులు పడుతున్నారని ఆవేదన వ్యక్తం చేశారు. పండ్లను విక్రయించేందుకు వచ్చే రైతులు, కొనుగోలుదారులు కూడా ఇబ్బందులు ఎదుర్కొంటున్నారని తెలిపారు. వేలాది మంది రైతులు, వ్యాపారుల జీవనోపాధికి సంబంధించిన సమస్యను ప్రభుత్వం తక్షణమే పరిష్కరించాలని డిమాండ్ చేశారు.
ప్రభుత్వానికి బీజేపీ సూటి ప్రశ్నలు..
నిర్మాణంలో ఉన్న 85 గదులను ఎప్పటిలోగా పూర్తి చేస్తారు? పాత మార్కెట్ వ్యాపారులకు, రైతులకు ఏ ప్రాతిపదికన కేటాయిస్తారు? అసంపూర్తిగా ఉన్న మార్కెట్ పనులను ఎప్పుడు పూర్తిచేసి అందుబాటులోకి తీసుకొస్తారు? అని ప్రభుత్వాన్ని నిలదీశారు.
అదేవిధంగా వరంగల్ తూర్పు ఎమ్మెల్యే కొండా సురేఖ ఈ సమస్యపై ప్రత్యేక దృష్టి సారించి వ్యాపారులకు న్యాయం చేయాలని కోరారు.
వ్యాపారుల పక్షాన బీజేపీ పోరాటం!
వరంగల్ వ్యాపారుల సహనాన్ని చేతకానితనంగా భావించవద్దని గంట రవికుమార్ హెచ్చరించారు. కేవలం హామీలతో ఓట్లు అడగడం కాదు.. చేతల్లో అభివృద్ధి చూపించాలని ప్రభుత్వానికి సూచించారు. తక్షణమే పండ్ల మార్కెట్ నిర్మాణ పనులు పూర్తి చేసి రైతులు, వ్యాపారులకు న్యాయం చేయాలని డిమాండ్ చేశారు.
ప్రజా సమస్యలపై ప్రశ్నించే గొంతుకగా బీజేపీ నిలుస్తుందని, పండ్ల మార్కెట్ వ్యాపారులు, రైతుల పక్షాన నిరంతరం పోరాటం కొనసాగిస్తామని స్పష్టం చేశారు.
ఈ కార్యక్రమంలో పండ్ల మార్కెట్ అధ్యక్షులు వెల్ది సాంబయ్య, గౌరవ అధ్యక్షులు మల్లారెడ్డి, మాజీ ఎంపీ ప్రొఫెసర్ అజ్మీర సీతారాం నాయక్, బీజేపీ రాష్ట్ర కార్యవర్గ సభ్యులు కుసుమ సతీష్, జలగం రంజిత్ రావు, రత్నం సతీష్ షా, గురుమూర్తి శివకుమార్, జిల్లా ప్రధాన కార్యదర్శులు బాకం హరిశంకర్, బన్న ప్రభాకర్, జిల్లా ఉపాధ్యక్షులు, కార్యదర్శులు, వివిధ మోర్చాల నాయకులు, మండల అధ్యక్షులు, మార్కెట్ కమిటీ సభ్యులు, జిల్లా మరియు మండల నాయకులు, కార్యకర్తలు పాల్గొన్నారు.
