పోరుమామిళ్ల ( కడప జిల్లా):అక్టోబర్ 27ప్రజావాణి జిల్లా పోరుమామిళ్ల మండల రాజకీయాల్లో సరికొత్త అధ్యాయం లిఖించబడింది. మండల పరిధిలోని సిద్ధవరం స్థానానికి జరిగిన స్థానిక సంస్థల ఎన్నికల్లో వైఎస్ఆర్ కాంగ్రెస్ పార్టీ తరపున బరిలోకి దిగిన యువ నేత, పార్టీ నమ్మకస్థుడు చిత్తాగిరి ప్రణీత్ రెడ్డి ఏకగ్రీవంగా ఎన్నికయ్యారు. ప్రత్యర్థి వర్గాల నుండి మరెవ్వరూ పోటీలో నిలబడకపోవడంతో ప్రణీత్ రెడ్డి ఎన్నిక ఏకగ్రీవమైనట్లు ఎన్నికల అధికారులు అధికారికంగా ప్రకటించారు.చిత్తాగిరి ప్రణీత్ రెడ్డి మొదటి నుండి వైఎస్ఆర్ కాంగ్రెస్ పార్టీలో క్రియాశీలక పాత్ర పోషిస్తూ, స్థానిక యువతను మరియు ప్రజలను తన సేవా కార్యక్రమాలతో ఆకట్టుకున్నారు. వైఎస్ఆర్సీపీ రాష్ట్ర యువజన సంయుక్త కార్యదర్శిగా బాధ్యతలు నిర్వర్తిస్తూనే, నిరంతరం క్షేత్రస్థాయిలో ప్రజలకు అందుబాటులో ఉంటూ వచ్చారు. సిద్ధవరం ప్రాంతంలో ఆయన కుటుంబానికి, వ్యక్తిగతంగా ఆయనకు ఉన్న మంచి పేరు, సేవా దృక్పథమే ఈ ఏకగ్రీవ ఎన్నికకు ప్రధాన కారణమని స్థానిక విశ్లేషకులు భావిస్తున్నారు.ప్రణీత్ రెడ్డి ఏకగ్రీవంగా ఎన్నికయ్యారనే వార్త తెలియగానే సిద్ధవరం గ్రామం మరియు పోరుమామిళ్ల మండల వ్యాప్తంగా వైఎస్ఆర్సీపీ శ్రేణుల్లో, అభిమానుల్లో హర్షాతిరేకాలు వ్యక్తమయ్యాయి. పార్టీ కార్యకర్తలు, ముఖ్యాధికారులు బాణాసంచా కాల్చి, స్వీట్లు పంచుకుంటూ పెద్ద ఎత్తున సంబరాలు జరిపారు. ప్రణీత్ రెడ్డికి శాలువాలు కప్పి, పూలమాలలతో ఘనంగా సన్మానించారు.
ప్రజాసేవే నా ప్రథమ కర్తవ్యం – చిత్తాగిరి ప్రణీత్ రెడ్డి:
ఈ సందర్భంగా నూతన ఎంపీటీసీ సభ్యుడు చిత్తాగిరి ప్రణీత్ రెడ్డి మాట్లాడుతూ. తనపై నమ్మకంతో ఏకగ్రీవంగా ఎన్నుకున్న సిద్ధవరం ప్రజలకు, తనకు ఈ అవకాశం కల్పించిన వైఎస్ఆర్ కాంగ్రెస్ పార్టీ అధిష్టానానికి, వైఎస్ జగన్ మోహన్ రెడ్డి కి మరియు నియోజకవర్గ ముఖ్య నాయకులకు ప్రత్యేక ధన్యవాదాలు తెలియజేశారు. గ్రామాల్లో మౌలిక వసతుల కల్పన, తాగునీరు, డ్రైనేజీ సమస్యల పరిష్కారమే ధ్యేయంగా ముందుకు సాగుతానని హామీ ఇచ్చారు. ప్రజా సమస్యలను ఎప్పటికప్పుడు తెలుసుకుంటూ, వాటి పరిష్కారానికి అహర్నిశలు కృషి చేస్తానని, సిద్ధవరం స్థానాన్ని ఆదర్శవంతంగా తీర్చిదిద్దుతానని ఆయన ఆశాభావం వ్యక్తం చేశారు. ఈ కార్యక్రమంలో మండల స్థాయి వైఎస్ఆర్సీపీ నేతలు, గ్రామ పెద్దలు, యువత మరియు పెద్ద సంఖ్యలో ప్రజలు పాల్గొని ప్రణీత్ రెడ్డికి శుభాకాంక్షలు తెలియజేశారు.
