గోపవరం,సెప్టెంబర్ 16:ప్రజావాణి మండల పరిధిలోని ఎంపీటీసీ,జెడ్పీటీసీ ఎన్నికల నిర్వహణకు సంబంధించిన ముసాయిదా పోలింగ్ కేంద్రాల ప్రక్రియ వేగవంతమైంది. ఇందులో భాగంగా ఈరోజు గోపవరం మండల పరిషత్ అభివృద్ధి అధికారి కార్యాలయంలో వివిధ రాజకీయ పార్టీల ప్రతినిధులతో ఒక ముఖ్యమైన సమావేశాన్ని ఏర్పాటు చేశారు. ఈ సమావేశానికి మండల అభివృద్ధి అధికారి శ్రీధర్ అధ్యక్షత వహించారు.రాబోయే ఎన్నికలను అత్యంత పారదర్శకంగా,శాంతియుతంగా నిర్వహించడమే లక్ష్యంగా ఈ సమావేశం సాగింది.సమావేశంలో మండలంలోని ఆయా గ్రామాల్లో ఏర్పాటు చేయబోయే ముసాయిదా పోలింగ్ కేంద్రాల వివరాలను రాజకీయ పార్టీల నాయకులకు అధికారులు క్షుణ్ణంగా వివరించారు. ఓటర్లకు అందుబాటులో ఉండేలా, ఎలాంటి ఇబ్బందులు కలగకుండా పోలింగ్ కేంద్రాలను ఎంపిక చేసినట్లు ఎంపీడీఓ శ్రీధర్ ఈ సందర్భంగా తెలిపారు.
అభ్యంతరాలు ఉంటే వ్రాతపూర్వకంగా తెలపాలి:
ముసాయిదా జాబితాలో పేర్కొన్న పోలింగ్ కేంద్రాల స్థానాలపై లేదా మార్పులపై రాజకీయ పార్టీలకు గానీ, అభ్యర్థులకు గానీ ఏవైనా అభ్యంతరాలు ఉంటే వాటిని వెంటనే అధికారుల దృష్టికి తీసుకురావాలని ఎంపీడీఓ సూచించారు. ఆయా అభ్యంతరాలను కేవలం నోటిమాటగా కాకుండా, స్పష్టమైన ఆధారాలతో వ్రాతపూర్వకంగా తమ కార్యాలయంలో అందజేయాలని స్పష్టం చేశారు. అలా వచ్చిన వ్రాతపూర్వక విజ్ఞప్తులను పరిశీలించి,నిబంధనల ప్రకారం తగిన చర్యలు తీసుకుంటామని ఆయన హామీ ఇచ్చారు.
ఎన్నికల ప్రక్రియలో రాజకీయ పార్టీల సహకారం ఎంతో కీలకమని, ప్రతి ఒక్కరూ నిబంధనలకు కట్టుబడి ఉండాలని కోరారు. పోలింగ్ కేంద్రాల ఖరారులో ఎలాంటి పొరపాట్లకు తావులేకుండా ఉండేందుకే ఈ ముందస్తు సమావేశాన్ని ఏర్పాటు చేసినట్లు అధికారులు వెల్లడించారు.ఈ కార్యక్రమంలో వైఎస్సార్ కాంగ్రెస్ పార్టీ,తెలుగుదేశం,జనసేన,కాంగ్రెస్,బీజేపీ తదితర ముఖ్య రాజకీయ పార్టీల మండల ప్రతినిధులు,స్థానిక నాయకులు మరియు ఈఓపీఆర్డీ,కార్యాలయ సిబ్బంది పాల్గొన్నారు.రాజకీయ పార్టీల నాయకులు ముసాయిదా జాబితాను పరిశీలించి,తమ అభిప్రాయాలను అధికారులతో పంచుకున్నారు
గోపవరం ఎంపీడీఓ కార్యాలయంలో రాజకీయ పార్టీలతో సమావేశం: ముసాయిదా పోలింగ్ కేంద్రాల వివరాల వెల్లడి
RELATED ARTICLES
