హుస్నాబాద్, సెప్టెంబర్ 2 (ప్రజావాణి)
గౌరవెల్లి రిజర్వాయర్ పరిధిలో భూములు కోల్పోయిన నిర్వాసితులకు అందాల్సిన ఆర్ అండ్ ఆర్ ప్యాకేజీని తక్షణమే విడుదల చేయాలని కోరుతూ బాధితులు స్థానిక ఆర్డీవోకు వినతిపత్రం అందజేశారు. ప్రాజెక్టు కోసం భూములు కోల్పోయి ఆరేళ్లు గడుస్తున్నా తమ సమస్య పరిష్కారం కాలేదని వారు ఆవేదన వ్యక్తం చేశారు.
గత ప్రభుత్వం రూ.6 లక్షల ప్యాకేజీ ఇస్తామని హామీ ఇచ్చి కాలయాపన చేసిందని, ప్రస్తుత కాంగ్రెస్ ప్రభుత్వంలో మంత్రి పొన్నం ప్రభాకర్ హామీ ఇచ్చినప్పటికీ 117 మందికి ఇప్పటికీ ప్యాకేజీ అందలేదని నిర్వాసితులు తెలిపారు. భూములు కోల్పోవడంతో పాటు ప్యాకేజీ డబ్బులు అందక ఆడపిల్లల పెళ్లిళ్లు చేయలేక, ఆర్థికంగా తీవ్ర ఇబ్బందులు ఎదుర్కొంటున్నామని వాపోయారు.
ఏళ్లుగా అధికారులు, ప్రజాప్రతినిధుల చుట్టూ తిరిగి అలసిపోయామని పేర్కొన్న వారు, ప్రభుత్వం ఇప్పటికైనా స్పందించి మిగిలి ఉన్న 117 మంది నిర్వాసితులకు తక్షణమే ఆర్ అండ్ ఆర్ ప్యాకేజీ అందించి ఆదుకోవాలని విజ్ఞప్తి చేశారు.
