*వాట్సాప్ గ్రూపుల్లో తప్పుడు ప్రచారాలు చేయొద్దు..*
*చట్టవిరుద్ధమైన పోస్టులు పెడితే, ప్రోత్సహిస్తే అడ్మిన్లపైనా చట్టపరమైన చర్యలు..*
*భద్రాచలం డీఎస్పీ ఎం. అరుణ్ కుమార్*
భద్రాచలం, అక్టోబర్ 27 (మన ప్రజావాణి): భద్రాచలం పట్టణంలోని వాట్సాప్ గ్రూపుల్లో తప్పుడు సమాచారం, నిరాధార ఆరోపణలు, అసభ్యకరమైన వ్యాఖ్యలు, వ్యక్తిగత దూషణలు చేసే వారిపై చట్టప్రకారం చర్యలు తీసుకుంటామని భద్రాచలం డీఎస్పీ ఎం. అరుణ్ కుమార్ హెచ్చరించారు. మంగళవారం రోజు భద్రాచలం డీఎస్పీ కార్యాలయంలో పట్టణంలోని వివిధ వాట్సాప్ గ్రూపుల అడ్మిన్లతో నిర్వహించిన సమావేశంలో ఆయన మాట్లాడుతూ సామాజిక మాధ్యమాలను బాధ్యతాయుతంగా వినియోగించాలని సూచించారు. వాస్తవాలను నిర్ధారించుకోకుండా తప్పుడు సమాచారాన్ని ప్రచారం చేయడం, ఇతరుల వ్యక్తిగత ప్రతిష్ఠకు భంగం కలిగించేలా పోస్టులు పెట్టడం, ప్రజల్లో అనవసర భయాందోళనలు లేదా వివాదాలు సృష్టించే చర్యలకు దూరంగా ఉండాలన్నారు.
వాట్సాప్ గ్రూపుల అడ్మిన్లు తమ గ్రూపుల్లో జరుగుతున్న కార్యకలాపాలను పర్యవేక్షించాలని, అభ్యంతరకరమైన లేదా చట్టవిరుద్ధమైన పోస్టులు గుర్తించినప్పుడు వాటిని తొలగించేందుకు తగిన చర్యలు తీసుకోవాలని సూచించారు. పదేపదే నిబంధనలను ఉల్లంఘించే వ్యక్తుల విషయంలో గ్రూపు నిబంధనల ప్రకారం చర్యలు తీసుకోవాలన్నారు. చట్టవిరుద్ధమైన ప్రచారంలో అడ్మిన్ల ప్రమేయం లేదా వర్తించే చట్టం ప్రకారం బాధ్యత ఉన్నట్లు ఆధారాలతో తేలితే వారిపైనా చట్టపరమైన చర్యలు తీసుకుంటామని హెచ్చరించారు. ప్రజలకు ఉపయోగపడే సమాచారం, ప్రభుత్వ సూచనలు, సామాజిక అవగాహన కల్పించే అంశాలను పంచుకునేందుకు వాట్సాప్ గ్రూపులను వినియోగించాలని డీఎస్పీ కోరారు. ఏదైనా సమాచారం అనుమానాస్పదంగా ఉన్నప్పుడు దానిని ఇతరులకు పంపించే ముందు వాస్తవాలను నిర్ధారించుకోవాలని, శాంతిభద్రతల పరిరక్షణలో పోలీసులకు సహకరించాలని విజ్ఞప్తి చేశారు. ఈ సమావేశంలో భద్రాచలం టౌన్ సీఐ ఎస్. రాజు, టౌన్ ఎస్ఐ సతీష్, ట్రాఫిక్ ఎస్ఐ కేశవ్ తదితరులు పాల్గొన్నారు.
