*మేడ్చల్ సీఎస్ఐ వెస్లీ చర్చిలో ఘనంగా యువజన ఆదివారపు ఆరాధన*
*దైవ వాక్యంతో యువతకు దిశానిర్దేశం.. క్రైస్తవ విలువలతో జీవించాలని సందేశం*
మేడ్చల్ ప్రజావాణి :- మేడ్చల్‌లోని సీఎస్ఐ వెస్లీ చర్చిలో యువజన ఆదివారపు ఆరాధన కార్యక్రమం భక్తిశ్రద్ధలతో, ఆనందోత్సాహాల మధ్య జరిగింది. చర్చి ఇన్‌చార్జ్ రెవరెండ్ జోసెఫ్ కిషోర్ గారి మార్గదర్శకత్వంలో నిర్వహించిన ఈ కార్యక్రమంలో యువత ఉత్సాహంగా పాల్గొన్నారు. ఈ సందర్భంగా యువత ప్రదర్శించిన స్కిట్‌లు, ఆలపించిన ఆధ్యాత్మిక గీతాలు ప్రత్యేక ఆకర్షణగా నిలిచాయి. దైవ వాక్య పఠనం, ప్రార్థనలు, ఆధ్యాత్మిక సందేశాలతో ఆరాధన కార్యక్రమం ఆశీర్వాదకరంగా కొనసాగింది.
ఈ కార్యక్రమంలో రెవరెండ్ సైరస్ మాట్లాడుతూ, సమాజంలో ఎదురయ్యే మంచి, చెడు పరిస్థితులను విశ్వాసంతో ఎదుర్కోవాలని యువతకు పిలుపునిచ్చారు. క్రైస్తవ విలువలను ఆచరిస్తూ, నైతికతకు ప్రాధాన్యమిస్తూ, సమాజానికి ఆదర్శంగా నిలిచే విధంగా జీవించాలని సూచించారు. విశ్వాసం, ప్రేమ, సేవాభావం, ఐక్యత వంటి విలువలను జీవితంలో భాగం చేసుకోవాలని సందేశమిచ్చారు.
అనంతరం నిర్వహించిన సహవాస భోజనంతో కార్యక్రమం ఆనందంగా ముగిసింది. ఈ ఆరాధన యువతలో ఆధ్యాత్మిక చైతన్యాన్ని, ఐక్యతా భావాన్ని పెంపొందించేందుకు దోహదపడింది.
