చండూరు విద్యావేత్త డా. ఇ. శ్రీనివాసచారికి ‘టీచర్ ఎక్సలెన్స్ అవార్డు’
నల్గొండ జిల్లా ప్రతినిధి ప్రజావాణి
చండూరు పట్టణానికి చెందిన ప్రముఖ విద్యావేత్త, తెలుగు అధ్యాపకుడు డా. ఇ. శ్రీనివాసచారి విద్యారంగంలో అందిస్తున్న విశిష్ట సేవలకు మరో ప్రతిష్ఠాత్మక గౌరవం లభించింది. విద్యార్థుల విద్యాభివృద్ధి, తెలుగు భాషా–సాహిత్య బోధన, ఉపాధ్యాయ శిక్షణ, విద్యా సామగ్రి రూపకల్పన, బోధనా నైపుణ్యాల అభివృద్ధికి చేస్తున్న కృషిని గుర్తిస్తూ ఆయనను ‘టీచర్ ఎక్సలెన్స్ అవార్డు’కు ఎంపిక చేశారు. శారద ఎడ్యుకేషనల్ సొసైటీ, హైదరాబాద్ ఆధ్వర్యంలో నిర్వహించనున్న అంతర్జాతీయ ఉపాధ్యాయ దినోత్సవ వేడుకల్లో డా. ఇ. శ్రీనివాసచారి కి ఈ ప్రతిష్ఠాత్మక పురస్కారాన్ని అందజేయనున్నారు.
విద్యార్థుల్లో అభ్యసన సామర్థ్యాలను పెంపొందించడం, ఉపాధ్యాయులకు మార్గదర్శకత్వం అందించడం, తెలుగు బోధనను మరింత ప్రభావవంతంగా తీర్చిదిద్దడం వంటి కార్యక్రమాల్లో డా. ఇ. శ్రీనివాసచారి చేస్తున్న కృషికి ఈ అవార్డు గుర్తింపుగా నిలుస్తుందని నిర్వాహకులు తెలిపారు. బోధనను వృత్తిగా కాకుండా బాధ్యతగా భావిస్తూ విద్యార్థుల భవిష్యత్తు కోసం నిరంతరం కృషి చేస్తున్న ఆయన సేవలకు ఈ పురస్కారం ఒక సముచిత గౌరవమని పేర్కొన్నారు. ఈ అవార్డు ప్రదానోత్సవం 2026 అక్టోబర్ 11న ఉదయం 11:00 గంటలకు హైదరాబాద్ లక్డీకాపూల్‌లోని పబ్లిక్ గార్డెన్స్, తెలంగాణ అసెంబ్లీ సమీపంలోని భగవాన్ మహావీర్ ఆడిటోరియం (డా. వై.ఎస్.ఆర్. స్టేట్ మ్యూజియం) లో నిర్వహించనున్నారు.
ఈ సందర్భంగా డా. ఇ. శ్రీనివాసచారిని ‘టీచర్ ఎక్సలెన్స్ అవార్డు’తో ఘనంగా సత్కరించనున్నారు. చండూరు పట్టణానికి చెందిన విద్యావేత్తకు రాష్ట్ర రాజధాని హైదరాబాద్‌లో ప్రతిష్ఠాత్మక పురస్కారం లభించడం పట్ల ఉపాధ్యాయులు, సాహితీవేత్తలు, విద్యాభిమానులు, మిత్రులు హర్షం వ్యక్తం చేస్తూ శ్రీనివాసచారికి అభినందనలు తెలిపారు.
