*ఈ ఉరుకుల పరుగుల జీవితంలో మనం కోల్పోతున్నది ఏమిటి?*
రాయికల్; అక్టోబర్ 01 (ప్రజావాణి)
(కనికరపు లక్ష్మణ్ రిపోర్టర్)
“సమయం లేదు” అనే మాట ఈ రోజుల్లో ప్రతి ఒక్కరి నోటా వినిపిస్తోంది. ఉదయం నిద్ర లేచినప్పటి నుంచి రాత్రి కళ్లుమూసే వరకు ఉరుకులు, పరుగులే. డబ్బు సంపాదించాలనే తపనలో మనం అసలు కోల్పోతున్నది ఏమిటో ఒక్కసారి ఆలోచించాల్సిన అవసరం ఉందని ఇంటర్నేషనల్ హ్యూమన్ రైట్స్ ప్రొడక్షన్ కౌన్సిల్ జగిత్యాల జిల్లా అధ్యక్షుడు ఆడెపు రాజమౌళి తెలిపారు.డబ్బు సంపాదించడం తప్పు కాదు, కానీ డబ్బు కోసం జీవితాన్నే మర్చిపోవడం ఆలోచించాల్సిన విషయం. కుటుంబం కోసం సంపాదిస్తూ కుటుంబంతోనే సమయం గడపలేకపోతే ఆ సంపాదనకు అర్థం ఏమిటి? అని ఆయన ప్రశ్నించారు.పిల్లలకు కావాల్సింది కేవలం డబ్బు, ఖరీదైన వస్తువులు మాత్రమే కాదు. తల్లిదండ్రుల ప్రేమ, ఆప్యాయత, వారితో గడిపే కొంత సమయం కూడా ఎంతో అవసరం. ఒకప్పుడు తల్లిదండ్రులు, పిల్లలు కలిసి భోజనం చేసేవారు. ఇప్పుడు ఒకే ఇంట్లో ఉంటూ కూడా ప్రతి ఒక్కరూ తమ తమ ఫోన్లలో మునిగిపోతున్నారని ఆవేదన వ్యక్తం చేశారు.మన కోసం జీవితమంతా కష్టపడిన తల్లిదండ్రులు వృద్ధాప్యంలో మనతో రెండు మాటలు మాట్లాడాలని కోరుకుంటారు. కానీ మన దగ్గర “సమయం లేదు”. ఒకరోజు వారి కోసం సమయం కేటాయించాలనుకునే సమయానికి వారు మన మధ్య లేకపోతే మిగిలేది పశ్చాత్తాపం మాత్రమేనని అన్నారు.సంపాదన కోసం ఆరోగ్యాన్ని నిర్లక్ష్యం చేస్తున్నామని, చివరికి సంపాదించిన డబ్బులో పెద్ద భాగం ఆసుపత్రి ఖర్చులకే వెళ్తోందని తెలిపారు. మానవ సంబంధాలు కూడా క్రమంగా దూరమవుతున్నాయని, పక్కింటి వారి కష్టసుఖాలు తెలియని పరిస్థితి వచ్చిందన్నారు.జీవితం అంటే కేవలం సంపాదించడం కాదు, మన చుట్టూ ఉన్నవారిని సంతోషంగా ఉంచడం కూడా జీవితమే. డబ్బు పోతే మళ్లీ సంపాదించుకోవచ్చు, కానీ గడిచిపోయిన సమయం, దూరమైన మనుషులు తిరిగి రారని, అందుకే రోజుకు కనీసం కొంత సమయాన్ని కుటుంబానికి కేటాయించాలని ఆయన పిలుపునిచ్చారు.
