*తల్లిదండ్రుల హామీలతో విజయవంతంగా పీటీఎం సమావేశం*
*విద్యార్థుల సమగ్ర అభివృద్ధికి తల్లిదండ్రుల పూర్తి సహకారం*
* *మన ప్రజావాణి* మందమర్రి:- జులై 19
మందమర్రిలోని పి.ఎం.తెలంగాణ మోడల్ స్కూల్ & జూనియర్ కళాశాలలో తల్లిదండ్రుల హామీలు అంశంపై తల్లిదండ్రుల ఉపాధ్యాయుల సమావేశం (పీటీఎం) ఘనంగా నిర్వహించారు. విద్యార్థుల విద్యా పురోగతి, క్రమశిక్షణ, సమగ్ర అభివృద్ధిలో తల్లిదండ్రుల పాత్ర ఎంత ముఖ్యమో ఈ సమావేశంలో విస్తృతంగా చర్చించారు.
సమావేశంలో పాల్గొన్న తల్లిదండ్రులు తమ పిల్లలను ప్రతిరోజూ క్రమం తప్పకుండా, సమయానికి పాఠశాలకు పంపిస్తామని, ఇంటి పనులు, ప్రాజెక్టులు, అసైన్మెంట్లు మరియు ఇతర విద్యా కార్యక్రమాలను సకాలంలో పూర్తి చేసేలా పర్యవేక్షిస్తామని హామీ ఇచ్చారు. అలాగే ప్రతి నెల మూడవ శనివారం నిర్వహించే తల్లిదండ్రుల ఉపాధ్యాయుల సమావేశాలకు తప్పనిసరిగా హాజరై పిల్లల విద్యా ప్రగతిని తెలుసుకుంటామని పేర్కొన్నారు.ఈ సందర్భంగా ప్రధానోపాధ్యాయురాలు సారా తస్నీమ్ పాఠశాల విద్యా ప్రమాణాలు, విద్యార్థులు వివిధ పరీక్షలు, పోటీలు, క్రీడలు, సాంస్కృతిక కార్యక్రమాల్లో సాధించిన విజయాలను తల్లిదండ్రులకు వివరించారు. విద్యార్థుల భవిష్యత్తు బలోపేతానికి పాఠశాల, తల్లిదండ్రులు పరస్పర సహకారంతో ముందుకు సాగితేనే ఆశించిన ఫలితాలు సాధ్యమవుతాయని తెలిపారు. విద్యార్థుల హాజరు, చదువుపై ఆసక్తి, నైతిక విలువలు, క్రమశిక్షణ పెంపొందించడంలో కుటుంబ సభ్యుల ప్రోత్సాహం అత్యంత అవసరమని సూచించారు. తల్లిదండ్రులు పాఠశాలలో అమలు చేస్తున్న బోధనా విధానం, విద్యార్థులకు అందిస్తున్న విద్యా సౌకర్యాలు, సహపాఠ్య కార్యక్రమాలపై సంతృప్తి వ్యక్తం చేశారు. పాఠశాల అభివృద్ధికి తమ వంతు సహకారాన్ని అందిస్తామని, విద్యార్థుల ఉత్తమ భవిష్యత్తు కోసం ఉపాధ్యాయులతో నిరంతరం సమన్వయం కొనసాగిస్తామని తెలిపారు.ఈ కార్యక్రమంలో ఉపాధ్యాయులు, తల్లిదండ్రులు పెద్ద సంఖ్యలో పాల్గొని సమావేశాన్ని విజయవంతం చేశారు. సమావేశం ద్వారా పాఠశాల తల్లిదండ్రుల మధ్య మరింత సాన్నిహిత్యం పెరిగి, విద్యార్థుల సమగ్ర అభివృద్ధికి ఉమ్మడి కార్యాచరణ చేపట్టాలనే సంకల్పం వ్యక్తమైంది.
తల్లిదండ్రుల హామీలతో విజయవంతంగా పీటీఎం సమావేశం
