ఘాట్ కేసర్ జూన్ 7 : ఘాట్ కేసర్ మండలానికి చెందిన యువకుడు మోసెస్ దేవదాస్ ప్రతిష్టాత్మక గిన్నిస్ ప్రపంచ రికార్డు సాధించి హైదరాబాద్కు అంతర్జాతీయ స్థాయిలో గుర్తింపు తీసుకొచ్చాడు. ప్రపంచవ్యాప్తంగా నిర్వహించిన అత్యధిక సంఖ్యలో ఎలక్ట్రానిక్ కీబోర్డ్ వాద్యకారులు ఒకే వేదికపై పాల్గొన్న సంగీత కార్యక్రమంలో భాగస్వామిగా నిలిచి ఈ ఘనతను అందుకున్నాడు.
ఈ రికార్డు కార్యక్రమాన్ని హల్లెల్ సంగీత పాఠశాల ఆధ్వర్యంలో ఈ ఏడాది ఫిబ్రవరి 2న హైదరాబాద్లో నిర్వహించారు. ఈ అంతర్జాతీయ సంగీత మహోత్సవంలో 22 దేశాలకు చెందిన సుమారు 2 వేల మంది కీబోర్డ్ వాద్యకారులు పాల్గొన్నారు.
గిన్నిస్ ప్రపంచ రికార్డుల సంస్థ నిర్వహించిన పరిశీలన అనంతరం 777 మందిని అధికారికంగా ప్రపంచ రికార్డు సాధకులుగా గుర్తించగా, వారిలో మోసెస్ దేవదాస్ కూడా ఒకరిగా నిలిచారు. దీంతో ఆయన పేరు ప్రపంచ రికార్డుల చరిత్రలో చిరస్థాయిగా నమోదైంది.
మోసెస్ దేవదాస్కు సంబంధించిన అధికారిక గిన్నిస్ ప్రపంచ రికార్డు ధ్రువపత్రం మరియు పతకాన్ని గచ్చిబౌలిలో నిర్వహించిన ప్రత్యేక సన్మాన కార్యక్రమంలో అందజేశారు. ఈ సన్మాన కార్యక్రమంలో యువత బైబిల్ మిషన్ హైదరాబాద్ వ్యవస్థాపక అధ్యక్షుడు, హల్లెల్ సంగీత పాఠశాల వ్యవస్థాపకుడు పాస్టర్ ఆగస్టిన్ డిండింగి చేతుల మీదుగా ఈ గౌరవం ప్రదానం చేయబడింది.
ఈ సందర్భంగా మోసెస్ దేవదాస్ మాట్లాడుతూ, “గిన్నిస్ ప్రపంచ రికార్డు సాధకుడిగా గుర్తింపు పొందడం నా జీవితంలో మరపురాని ఘట్టం. 22 దేశాల నుంచి పాల్గొన్న దాదాపు 2 వేల మందిలో ఎంపికైన 777 మంది రికార్డు సాధకుల్లో ఒకరిగా నిలవడం ఎంతో గర్వకారణం. ఈ విజయానికి సహకరించిన దేవునికి, నా కుటుంబ సభ్యులకు, స్నేహితులకు, శ్రేయోభిలాషులకు హృదయపూర్వక కృతజ్ఞతలు” అని తెలిపారు.
మోసెస్ దేవదాస్ సాధించిన ఈ అంతర్జాతీయ ఘనతపై కుటుంబ సభ్యులు, స్నేహితులు, సహచరులు, శ్రేయోభిలాషులు హర్షం వ్యక్తం చేస్తూ అభినందనలు తెలిపారు. ఆయన విజయం హైదరాబాద్ యువతకు స్ఫూర్తిదాయకంగా నిలుస్తుందని పేర్కొన్నారు.
