గత ప్రభుత్వ హయాంలో ఫిట్టింగ్ పూర్తి.. నేటికీ దక్కని ఓపెనింగ్ మోక్షం
తాళాల వెనకాలే బందీ అయిన స్వచ్ఛమైన నీరు.అధికారుల నిర్లక్ష్యంపై విద్యార్థుల ఆగ్రహం
పొరుమామిళ్ల ప్రజావాణి జూన్ 16 ప్రభుత్వ విద్యాలయాలను కార్పొరేట్ స్థాయిలో తీర్చిదిద్దుతామని,విద్యార్థులకు సకల సదుపాయాలు కల్పిస్తామని గత వైఎస్సార్ కాంగ్రెస్ పార్టీ ప్రభుత్వం ప్రగల్భాలు పలికిన‘మనబడి నాడు-నేడు’(ప్రస్తుతం [మన బడి మన భవిష్యత్తు]పథకం క్షేత్రస్థాయిలో అభాసుపాలవుతోంది.ప్రజాధనం లక్షల రూపాయలు వెచ్చించి ఏర్పాటు చేసిన మౌలిక వసతులు.అధికారుల పర్యవేక్షణ లోపం,రాజకీయ ఉదాసీనత వల్ల నిరుపయోగంగా మారుతున్నాయి. దీనికి సజీవ సాక్ష్యమే ప్రభుత్వ కాలేజీల్లో ఏర్పాటు చేసిన రివర్స్ ఆస్మాసిస్ (RO) వాటర్ ప్లాంట్లు.నెలలు గడుస్తున్నా, విద్యాసంవత్సరాలు మారుతున్నా ఈ ఆర్వో ప్లాంట్లు ప్రారంభానికి నోచుకోకపోవడంతోవిద్యార్థులు తీవ్ర దాహార్తితో అల్లాడిపోతున్నారు. 
అలంకార ప్రాయంగా మారిన ఆర్వో ప్లాంట్లు
గత ప్రభుత్వంలో నాడు-నేడు ఫేజ్ కింద ప్రభుత్వ కాలేజీలు, పాఠశాలల రూపురేఖలు మార్చే ప్రక్రియలో భాగంగా స్వచ్ఛమైన తాగునీరు అందించేందుకు లక్షల రూపాయల బడ్జెట్తో ఆర్వో ప్లాంట్లను మంజూరు చేశారు. కాలేజీ ప్రాంగణంలో ప్లాంట్ నిర్మాణం పూర్తి చేసి, మిషనరీని సైతం ఫిట్ చేశారు. అయితే.. పనులు పూర్తయి ఇంతకాలం అవుతున్నా,సదరు ప్లాంట్ను ఇంతవరకు ఓపెన్ చేయకపోవడం గమనార్హం. ప్రస్తుతం ఈ ప్లాంట్లు ఇనుప గేట్లు,తాళాల వెనుక మూలనపడి కేవలం బోర్డులకే పరిమితమయ్యాయి
లక్షల రూపాయల ప్రభుత్వ సొమ్మును ఖర్చు పెట్టి,ఇలా తుప్పు పట్టేలా వదిలేయడం వెనుక ఉన్న అంతర్యమేమిటని విద్యార్థులు,వారి తల్లిదండ్రులు ఘాటుగా ప్రశ్నిస్తున్నారు.తాగునీటి కోసం విద్యార్థుల అవస్థలు కాలేజీలో ఆర్వో ప్లాంట్ అందుబాటులో ఉన్నప్పటికీ.అది ఓపెన్ కాకపోవడంతో విద్యార్థులు తీవ్ర ఇబ్బందులు పడుతున్నారు. విద్యార్థులు సుదూర ప్రాంతాల నుండి తమ ఇళ్ల నుంచే నీటి బాటిళ్లను తెచ్చుకోవాల్సి వస్తోంది.వేసవి కాలం మరియు సాధారణ రోజుల్లో సైతం తెచ్చుకున్న నీరు సరిపోక, ప్రైవేట్ వాటర్ ప్యాకెట్లు లేదా క్యాన్లు కొనుగోలు చేస్తూ ఆర్థికంగా నష్టపోతున్నారు.తప్పనిసరి పరిస్థితుల్లో కాలేజీలోని బోరు నీటిని లేదా అపరిశుభ్రమైన నీటిని తాగి విద్యార్థులు తరచూ గ్యాస్ట్రిక్,విరేచనాలు వంటి అనారోగ్యాల బారిన పడుతున్నారు.పర్యవేక్షణ లోపం – బిల్లుల బేరసారాలు?
ఈ ప్లాంట్లు ప్రారంభం కాకపోవడానికి ప్రధాన కారణం కాంట్రాక్టర్లకు బిల్లులు సకాలంలో చెల్లించకపోవడం, లేదా విభాగాలు మరియు అధికారుల మధ్య సమన్వయ లోపమేనని విమర్శలు వినిపిస్తున్నాయి. ఫిట్టింగ్ పూర్తి చేసి చేతులు దులుపుకున్న సరఫరా సంస్థలు.ఆ తర్వాత నిర్వహణను, కనెక్షన్లను గాలికొదిలేశాయి. కనీసం విద్యుత్ కనెక్షన్ ఇవ్వకపోవడం,వాటర్ పైప్లైన్ అనుసంధానం చేయకపోవడం వంటి చిన్న చిన్న కారణాలతో ప్లాంట్లను తాళాలకే పరిమితం చేశారు. విద్యాశాఖ ఉన్నతాధికారులు కానీ, కాలేజీ యాజమాన్యం కానీ దీనిపై ప్రత్యేక దృష్టి పెట్టకపోవడం ప్రజాధనాన్ని దుర్వినియోగం చేయడమే అవుతుంది.ప్రభుత్వాలు మారినా విద్యార్థుల సమస్యలు మాత్రం మారడం లేదు.ఎంతో ప్రతిష్టాత్మకంగా చేపట్టిన ప్రాజెక్టు ఇలా నిరుపయోగంగా మారడం అధికారుల నిర్లక్ష్యానికి పరాకాష్ట. ఇప్పటికైనా ఉన్నతాధికారులు మరియు జిల్లా విద్యాశాఖ అధికారులు తక్షణమే స్పందించి,కాలేజీలోని ఆర్వో ప్లాంట్ తాళాలు తీయించి,దానికి అవసరమైన కనెక్షన్లు పూర్తి చేసి విద్యార్థులకు స్వచ్ఛమైన తాగునీరు అందేలా చర్యలు చేపట్టాలని కాలేజీ విద్యార్థి సంఘాలు మరియు ప్రజలు డిమాండ్ చేస్తున్నారు.లేనిపక్షంలో విద్యార్థులను కలుపుకొని పెద్ద ఎత్తున ఆందోళనలు చేపడతామని హెచ్చరిస్తున్నారు.
