*బోరుపైనే బలప్రయోగం.. కరెంట్‌ స్తంభాలపై మౌనమెందుకు?*
ప్రజల దాహం తీర్చే బోరే అభివృద్ధికి అడ్డంకిగా మారిందా?
కాలువలోకి వచ్చిన కరెంట్‌ స్తంభాలపై చర్యలేవీ?
ప్రత్యామ్నాయ తాగునీరు చూపాకే బోరు తొలగించాలంటున్న స్థానికులు.
కేసముద్రం, నవంబర్‌ 11,ప్రజావాణి.
పట్టణ అభివృద్ధి అంటే ప్రజలకు మెరుగైన సౌకర్యాలు కల్పించడమా? లేక ఇప్పటికే ఉన్న కనీస అవసరాలను తొలగించడమా? కేసముద్రం మున్సిపాలిటీలో రోడ్డు విస్తరణ పనుల నేపథ్యంలో తలెత్తిన ఓ సమస్య ఇప్పుడు స్థానికుల్లో తీవ్ర చర్చకు దారితీసింది. ప్రజల దాహార్తిని తీర్చే తాగునీటి బోరును తొలగించాలంటూ మున్సిపల్‌ కమిషనర్‌ ప్రజలను బెదిరింపుల ఆందోళన కలిగిస్తోంది. అదే సమయంలో రోడ్డు పక్కన కాలువలోకి వచ్చిన విద్యుత్‌ స్తంభాల విషయంలో చర్యలు కనిపించడం లేదని స్థానికులు ప్రశ్నిస్తున్నారు.
*ఒకే పనిలో రెండు రకాల ప్రాధాన్యతలా?*
రోడ్డు విస్తరణలో భాగంగా కాలువలోకి వచ్చిన విద్యుత్‌ స్తంభాలు స్థానికులకు ఆందోళన కలిగిస్తున్నాయి. కాలువలో నీరు నిలిచే సమయంలో విద్యుత్‌ భద్రతకు ముప్పు ఏర్పడే అవకాశం ఉందని వారు చెబుతున్నారు. విద్యుత్‌ స్తంభాల విషయంలో సంబంధిత శాఖలతో సమన్వయం చేసి సమస్యను పరిష్కరించాల్సిన అధికారులు.. ప్రజలు తాగునీటి కోసం ఉపయోగించుకుంటున్న బోరును తొలగించాలని తెలపడం ఏమిటని నిలదీస్తున్నారు. ముందుగా ప్రజల భద్రతకు సంబంధించిన సమస్యలను పరిష్కరించాల్సిన అవసరం లేదా అని ప్రశ్నిస్తున్నారు.
*బోరు తొలగిస్తే నీళ్లు ఎక్కడి నుంచి?*
స్థానిక కుటుంబాలకు తాగునీటి అవసరాలు తీర్చడంలో ఈ బోరు కీలకంగా ఉందని ప్రజలు చెబుతున్నారు. రోడ్డు విస్తరణకు బోరు అడ్డుగా ఉంటే అభ్యంతరం లేదని, అయితే దానిని తొలగించే ముందు ప్రత్యామ్నాయ తాగునీటి సదుపాయం కల్పించాలని కోరుతున్నారు. నీటి వసతి కల్పించకుండా బోరును తొలగిస్తే కుటుంబాలు తాగునీటి కోసం ఇబ్బందులు పడాల్సి వస్తుందని ఆవేదన వ్యక్తం చేస్తున్నారు. అభివృద్ధి పనులు ప్రజల జీవన సౌకర్యాలను మెరుగుపరచాలే తప్ప, ఉన్న సౌకర్యాలను దూరం చేయకూడదని అంటున్నారు.
*అభివృద్ధితో పాటు ప్రజా భద్రతా ముఖ్యం!*
రోడ్డు విస్తరణ పట్టణ అభివృద్ధికి అవసరమే. అయితే అదే సమయంలో విద్యుత్‌ స్తంభాల భద్రత, కాలువల నిర్మాణం, తాగునీటి సౌకర్యాల పరిరక్షణకు సమాన ప్రాధాన్యత ఇవ్వాల్సిన బాధ్యత అధికారులపై ఉంది. ఒక సమస్యను పరిష్కరిస్తూ మరో సమస్యను సృష్టించకుండా సమగ్ర ప్రణాళికతో పనులు చేపట్టాలని స్థానికులు సూచిస్తున్నారు. సంబంధిత శాఖల అధికారులు క్షేత్రస్థాయిలో పరిశీలించి ప్రజలకు ఇబ్బందులు కలగకుండా చర్యలు తీసుకోవాలని కోరుతున్నారు.
*మున్సిపల్‌ కమిషనర్‌ స్పందించాలి!*
బోరు తొలగింపునకు గల కారణాలేమిటి? ఆ ప్రాంత ప్రజలకు ప్రత్యామ్నాయ తాగునీటి వసతి కల్పించేందుకు ఏమైనా ప్రణాళిక ఉందా? కాలువలోకి వచ్చిన విద్యుత్‌ స్తంభాలను సరిచేసేందుకు విద్యుత్‌ శాఖతో సమన్వయం చేశారా? అనే ప్రశ్నలకు అధికారులు సమాధానం చెప్పాల్సిన అవసరం ఉంది. ప్రజల తాగునీటి అవసరాలను దృష్టిలో ఉంచుకుని బోరు తొలగింపు నిర్ణయాన్ని పునఃపరిశీలించాలని, ముందుగా ప్రత్యామ్నాయ నీటి వసతి కల్పించాలని స్థానికులు విజ్ఞప్తి చేస్తున్నారు.రోడ్డు విస్తరణ పనులు వేగంగా సాగాలి.. అదే సమయంలో ప్రజల ప్రాణాలకు భద్రత, ప్రతి ఇంటికీ తాగునీటి సౌకర్యం కూడా కొనసాగాలి. అభివృద్ధి పేరుతో ప్రజలకు ఇబ్బందులు కలగకుండా అధికారులు న్యాయబద్ధమైన నిర్ణయం తీసుకోవాలని స్థానికులు కోరుతున్నారు.
