గ్రాడ్యుయేట్ ఎమ్మెల్సీ ఎన్నికలో కాంగ్రెస్ గెలుపే లక్ష్యం
ఓటరు నమోదు ప్రక్రియను ప్రతిష్ఠాత్మకంగా తీసుకోవాలి.. ప్రభుత్వ సంక్షేమ పథకాలను ప్రజల్లోకి తీసుకెళ్లాలి
ఎమ్మెల్యే రేవూరి ప్రకాశ్ రెడ్డి
అగ్రంపహాడ్, అక్టోబర్ 26 (మన సమగ్ర ప్రజావాణి ప్రతినిధి):
వరంగల్–ఖమ్మం–నల్గొండ పట్టభద్రుల ఎమ్మెల్సీ ఎన్నికను కాంగ్రెస్ పార్టీ అత్యంత ప్రతిష్ఠాత్మకంగా తీసుకోవాలని, పార్టీ అభ్యర్థి రామ్ రెడ్డి సర్వోత్తమ్ రెడ్డి విజయానికి నాయకులు, కార్యకర్తలు సమష్టిగా కృషి చేయాలని పరకాల ఎమ్మెల్యే రేవూరి ప్రకాశ్ రెడ్డి పిలుపునిచ్చారు. పట్టభద్రుల ఓటరు నమోదు ప్రక్రియలో ప్రతి కార్యకర్త చురుగ్గా పాల్గొని, పరకాల నియోజకవర్గం నుంచి కాంగ్రెస్ అభ్యర్థికి అత్యధిక మెజారిటీ సాధించేలా పనిచేయాలని సూచించారు.
ఆత్మకూరు మండలం అగ్రంపహాడ్‌లోని శ్రీ సమ్మక్క–సారలమ్మ గద్దెల సమీపంలో ఉన్న జీఎస్‌ఆర్ గార్డెన్‌లో ఎమ్మెల్యే రేవూరి ప్రకాశ్ రెడ్డి అధ్యక్షతన కాంగ్రెస్ పార్టీ పరకాల నియోజకవర్గ స్థాయి విస్తృత సమావేశం నిర్వహించారు. ఈ సమావేశానికి వరంగల్ పార్లమెంట్ ఇన్‌చార్జి, ఎమ్మెల్సీ శంకర్ నాయక్, హనుమకొండ, వరంగల్ జిల్లాల కాంగ్రెస్ అధ్యక్షులు ఇనుగాల వెంకట్రామ్ రెడ్డి, ఎండీ ఆయూబ్, గ్రాడ్యుయేట్ ఎమ్మెల్సీ ఎన్నికల పరిశీలకుడు కక్కిరేణి శ్రీనివాస్‌తో పాటు పలువురు పార్టీ నాయకులు హాజరయ్యారు.
ఈ సందర్భంగా ఎమ్మెల్యే రేవూరి ప్రకాశ్ రెడ్డి మాట్లాడుతూ, ముఖ్యమంత్రి రేవంత్ రెడ్డి నాయకత్వంలోని కాంగ్రెస్ ప్రజా ప్రభుత్వం నిరుద్యోగులు, విద్యావంతుల సంక్షేమం కోసం తీసుకుంటున్న నిర్ణయాలు, చేపడుతున్న ఉద్యోగ నియామకాల గురించి పట్టభద్రులకు విస్తృతంగా వివరించాలని అన్నారు. ప్రభుత్వ పథకాలను సోషల్ మీడియా ద్వారా ప్రజల్లోకి తీసుకెళ్లడంతో పాటు, ప్రతిపక్షాలు చేస్తున్న అసత్య ప్రచారాన్ని సమర్థంగా తిప్పికొట్టాలని కార్యకర్తలకు సూచించారు.
సంక్షేమ పథకాలపై విస్తృత ప్రచారం
కాంగ్రెస్ ప్రభుత్వం అమలు చేస్తున్న ఇందిరమ్మ ఇళ్లు, రైతు భరోసా, రైతు రుణమాఫీ, 200 యూనిట్ల ఉచిత విద్యుత్, మహాలక్ష్మి పథకం, సన్న బియ్యం పంపిణీ తదితర సంక్షేమ కార్యక్రమాల గురించి ప్రతి గ్రామంలో ప్రజలకు వివరించాలని ఎమ్మెల్యే పేర్కొన్నారు. ప్రభుత్వ పథకాల ప్రయోజనాలను ప్రజలకు చేరవేయడంతో పాటు, పార్టీని బూత్ స్థాయి నుంచి మరింత బలోపేతం చేయాలని పిలుపునిచ్చారు.
పట్టభద్రుల ఓటరు నమోదు ప్రక్రియను సులభతరం చేసేందుకు నియోజకవర్గంలోని మండలాల వారీగా హెల్ప్‌డెస్క్‌లు ఏర్పాటు చేసినట్లు తెలిపారు. అర్హులైన ప్రతి పట్టభద్రుడు ఓటరుగా నమోదు చేసుకునేలా పార్టీ శ్రేణులు సమన్వయంతో పనిచేయాలని సూచించారు.
పార్టీ కమిటీల బలోపేతానికి చర్యలు
గ్రామ, మండల, జిల్లా స్థాయిల్లో కాంగ్రెస్ అనుబంధ సంఘాల కమిటీలను త్వరలో పూర్తిస్థాయిలో ఏర్పాటు చేస్తామని రేవూరి ప్రకాశ్ రెడ్డి వెల్లడించారు. ఎల్‌నినో ప్రభావంతో తలెత్తే పరిస్థితులు, వాటిని ఎదుర్కొనేందుకు ప్రభుత్వం చేపడుతున్న చర్యలపై ప్రజలకు అవగాహన కల్పించాలని నాయకులకు సూచించారు.
ఓటరు జాబితాల నుంచి అర్హులైన ఓటర్ల పేర్ల తొలగింపును వ్యతిరేకిస్తూ నవంబర్ 1న తెలంగాణ కాంగ్రెస్ చేపట్టనున్న చలో ఢిల్లీ నిరసన కార్యక్రమాన్ని విజయవంతం చేయాలని పార్టీ శ్రేణులకు పిలుపునిచ్చారు.
సమష్టి కృషితో విజయమే లక్ష్యం
పట్టభద్రుల ఎమ్మెల్సీ ఎన్నికలో కాంగ్రెస్ అభ్యర్థి విజయాన్ని లక్ష్యంగా పెట్టుకుని ప్రతి నాయకుడు, కార్యకర్త బాధ్యతతో పనిచేయాలని ఎమ్మెల్యే రేవూరి ప్రకాశ్ రెడ్డి స్పష్టం చేశారు. ప్రభుత్వ సంక్షేమ పథకాలను ప్రజల్లోకి తీసుకెళ్లడం, పట్టభద్రుల ఓటరు నమోదును వేగవంతం చేయడం, క్షేత్రస్థాయిలో పార్టీని బలోపేతం చేయడం ద్వారా ఎన్నికల్లో మెరుగైన ఫలితాలు సాధించేందుకు కృషి చేయాలని ఆయన పిలుపునిచ్చారు.
