*బండమాదారంలో ఘనంగా బతుకమ్మ వేడుకలు*
*బతుకమ్మ సంబరాల్లో పాల్గొన్న మున్సిపల్ వైస్ చైర్మన్ మేకల రజిత దేవేందర్ రెడ్డి*
మేడ్చల్ నేటి ప్రస్థానం:- తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగ వేడుకలు ఎల్లంపేట్ మున్సిపాలిటీ పరిధిలోని బండమాదారం 19వ వార్డులో ఉత్సాహంగా నిర్వహించారు. ఈ వేడుకల్లో మున్సిపల్ వైస్ చైర్మన్ మేకల రజిత దేవేందర్ రెడ్డి పాల్గొని మహిళలతో కలిసి బతుకమ్మ సంబరాల్లో భాగ స్వాములయ్యారు.
తెలంగాణ ఆడపడుచులు ఎంతో భక్తిశ్రద్ధలతో జరుపుకునే బతుకమ్మ పండుగ సందర్భంగా మహిళలు వివిధ రకాల రంగురంగుల పూలతో బతుకమ్మలను అందంగా పేర్చారు. అనంతరం బతుకమ్మల చుట్టూ చేరి సంప్రదాయ పాటలు పాడుతూ, ఆటపాటలతో వేడుకలను ఘనంగా జరుపుకున్నారు. మహిళల సందడి, బతుకమ్మ పాటలతో బండమాదారం 19వ వార్డులో పండుగ వాతావరణం నెలకొంది. ఈ సందర్భంగా మేకల రజిత దేవేందర్ రెడ్డి మాట్లాడుతూ, బతుకమ్మ పండుగ తెలంగాణ సంస్కృతి,
సంప్రదాయాలకు ప్రతీక అని పేర్కొన్నారు. ప్రకృతిని ఆరాధిస్తూ, పూలను పూజిస్తూ మహిళలు ఐకమత్యంతో జరుపుకునే ఈ పండుగకు ప్రత్యేకమైన గుర్తింపు ఉందన్నారు. తెలంగాణ సంస్కృతిని, ఆచార సంప్రదాయాలను భావితరాలకు అందించడంలో బతుకమ్మ పండుగ కీలక పాత్ర పోషిస్తుందని తెలిపారు. బతుకమ్మ వేడుకలు మహిళల్లో ఐక్యతను, ఆత్మీయతను పెంపొందించడంతో పాటు మన సంప్రదాయాల గొప్పతనాన్ని చాటిచెబుతాయని అన్నారు. ప్రతి ఒక్కరూ తెలంగాణ పండుగలను ఆదరిస్తూ, మన సంస్కృతి వైభవాన్ని కాపాడుకోవాలని ఆకాంక్షించారు. బండమాదారం 19వ వార్డులో నిర్వహించిన బతుకమ్మ వేడుకల్లో మహిళలు, స్థానికులు ఉత్సాహంగా పాల్గొని పండుగను ఆనందోత్సాహాల మధ్య జరుపుకున్నారు.
