పోరుమామిళ్లలో సొంత నిధులతో ప్రభుత్వ పాఠశాల రూపురేఖలు మార్చిన ఉపాధ్యాయుడు:

📰 Generate e-Paper Clip

పోరుమామిళ్ల,ఆగస్టు 18 ప్రజావాణి:ప్రభుత్వ పాఠశాలల్లో చదివే విద్యార్థులకు మెరుగైన వసతులు కల్పించాలనే సంకల్పంతో ఒక ఉపాధ్యాయుడు తన ఉదారతను చాటుకున్నారు.కేవలం విద్యాబోధనకే పరిమితం కాకుండా,పాఠశాల ప్రగతిలో భాగస్వామి అవుతూ తోటివారికి ఆదర్శంగా నిలిచారు.
కడప జిల్లా పోరుమామిళ్ల మండల కేంద్రంలోని మండల పరిషత్ ఆదర్శ ప్రాథమిక పాఠశాల (మెయిన్) కు గత సంవత్సరం జరిగిన బదిలీలలో ఉపాధ్యాయుడు చిన్నపురెడ్డి వెంకటరెడ్డి బదిలీపై వచ్చారు. పాఠశాలలో విద్యార్థుల అవసరాలను గమనించిన ఆయన,మౌలిక వసతుల కొరతను తీర్చడానికి స్వచ్ఛందంగా ముందుకు వచ్చారు.
రూ. 30 వేల సొంత నిధులతో మౌలిక వసతులు
ఉపాధ్యాయుడు వెంకటరెడ్డి తన సొంత నిధులు దాదాపు రూ.30,000 వరకు వెచ్చించి పాఠశాలలో అత్యవసరమైన పనులను చేపట్టారు. విద్యార్థుల ఆరోగ్య రక్షణకు ప్రాధాన్యతనిస్తూ అధునాతన హ్యాండ్ వాష్ ప్లాట్‌ఫామ్,కుళాయిలు ఏర్పాటు చేయించారు. పాఠశాల ప్రాంగణంలో నీరు నిల్వ ఉండకుండా ఉండేందుకు ఇంకుడు గుంతను నిర్మించారు. అలాగే గ్రౌండ్ లెవెలింగ్ పనులు చేయించి,పాఠశాల వాతావరణం పచ్చదనంతో ఆహ్లాదకరంగా ఉండేలా మొక్కలు నాటే కార్యక్రమాన్ని పెద్ద ఎత్తున చేపట్టారు. జాతీయ పండుగలు ఘనంగా నిర్వహించుకునేలా పాఠశాలలోని పాత జెండా దిమ్మెకు త్రివర్ణ పతాక రంగులు వేయించి సరికొత్తగా తీర్చిదిద్దారు.
దాతల సహకారంతో అదనపు వసతులు
తనతో పాటు తన మిత్ర బృందాన్ని,దాతలను కూడా పాఠశాల అభివృద్ధిలో వెంకటరెడ్డి భాగస్వాములను చేశారు.దాతల నుంచి సేకరించిన రూ.17,000 ఆర్థిక సహాయంతో పాఠశాలకు ఒక చక్కని సౌండ్ సిస్టమ్‌ను,అలాగే రూ.15,000 వ్యయంతో ఒక బీరువా మరియు అవసరమైన కుర్చీలను సమకూర్చారు.
ఉపాధ్యాయుడికి ఘన అభినందనలు
ఈ సందర్భంగా పాఠశాల ప్రధానోపాధ్యాయుడు షేక్ అబ్దుల్ సత్తార్,ఉపాధ్యాయురాలు కల్లూరి మాధవి మాట్లాడుతూ.వెంకటరెడ్డి సేవలను కొనియాడారు.విద్యార్థులకు నాణ్యమైన విద్యను అందించడంతో పాటు, పాఠశాల మౌలిక అవసరాలను గుర్తించి తన సొంత సొమ్మును ఖర్చు చేయడం అభినందనీయమన్నారు. ప్రభుత్వ పాఠశాలల బలోపేతానికి ఇలాంటి ఉపాధ్యాయులు,దాతల సహకారం ఎంతో స్ఫూర్తిదాయకమని పేర్కొంటూ ఉపాధ్యాయుడు వెంకటరెడ్డికి మరియు దాతలకు ప్రత్యేక కృతజ్ఞతలు తెలియజేశారు