prajavaani.net
Newspaper Banner
Date of Publish : 21 November 2026, 7:38 pm Digital Edition : UPENDHAR JANAGON

విద్యార్థుల్లో రాజ్యాంగ స్ఫూర్తి నింపిన డిఎల్ఎస్ఏ.. ఏకశిలా, వైష్ణవి స్కూళ్లలో అవగాహన కార్యక్రమాలు..!

 

చట్టాలపై అవగాహన ఉంటేనే బంగారు భవిష్యత్తు..

అడిషనల్ జూనియర్ సివిల్ జడ్జి కె. సందీప

జనగామ జిల్లా ప్రతినిధి జె.ఉపేందర్, నవంబర్ 21 (ప్రజావాణి):జిల్లా న్యాయ సేవాధికార సంస్థ (డిఎల్ఎస్ఏ) ఆధ్వర్యంలో జిల్లా కేంద్రంలోని ఏకశిలా పబ్లిక్ స్కూల్, వైష్ణవి హై స్కూల్‌లలో శనివారం న్యాయ విజ్ఞాన సదస్సులు ఘనంగా నిర్వహించారు. విద్యార్థుల్లో చిన్న వయస్సు నుంచే రాజ్యాంగ స్ఫూర్తిని, చట్టాలపై అవగాహనను పెంపొందించడమే ఈ కార్యక్రమాల లక్ష్యం.

ఈ రెండు కార్యక్రమాలకు ముఖ్య అతిథిగా అడిషనల్ జూనియర్ సివిల్ జడ్జి కె. సందీప పాల్గొని విద్యార్థులకు చట్టాలపై వివరణాత్మకంగా అవగాహన కల్పించారు.

ఈ సందర్భంగా ఆమె మాట్లాడుతూ, ప్రతి విద్యార్థి భారత రాజ్యాంగం కల్పించిన ప్రాథమిక హక్కులు, విధుల గురించి తప్పనిసరిగా తెలుసుకోవాలని సూచించారు. బాలల హక్కులు, మహిళల రక్షణ చట్టాలు, విద్యా హక్కు, సమాజంలో న్యాయం – సమానత్వం వంటి అంశాలపై విద్యార్థులు అవగాహన పెంచుకోవాలని తెలిపారు. విద్యార్థి దశ నుంచే చట్టాల పట్ల గౌరవం, క్రమశిక్షణ, సామాజిక బాధ్యత అలవర్చుకోవాలని పిలుపునిచ్చారు.

ఏకశిలా పబ్లిక్ స్కూల్‌లో నిర్వహించిన కార్యక్రమానికి పాఠశాల సెక్రటరీ చిర్ర ఉపేందర్ రెడ్డి అధ్యక్షత వహించగా, వైష్ణవి హై స్కూల్‌లో జరిగిన కార్యక్రమానికి విజయశ్రీ అధ్యక్షత వహించారు.

ఈ రెండు కార్యక్రమాల్లో చీఫ్ లీగల్ ఎయిడ్ డిఫెన్స్ కౌన్సిల్ మంచాల రవీందర్ పాల్గొని విద్యార్థులకు న్యాయ సేవాధికార సంస్థ అందిస్తున్న ఉచిత న్యాయ సహాయం గురించి వివరించారు. పేద, బలహీన వర్గాల ప్రజలకు న్యాయ సహాయం ఎలా అందుబాటులో ఉంటుందో, ఎవరైనా న్యాయ సహాయం కోసం ఎలా సంప్రదించాలో విద్యార్థులకు సులభంగా అర్థమయ్యేలా చెప్పారు.

ఈ కార్యక్రమాల్లో జిల్లా న్యాయ సేవాధికార సంస్థ సిబ్బంది, ఆయా పాఠశాలల ఉపాధ్యాయులు పాల్గొన్నారు. ఏకశిలా పబ్లిక్ స్కూల్‌లో సుమారు 800 మంది విద్యార్థులు, వైష్ణవి హై స్కూల్‌లో సుమారు 300 మంది విద్యార్థులు పాల్గొని న్యాయపరమైన అంశాలపై అవగాహన పొందారు. విద్యార్థులు తమ సందేహాలను న్యాయమూర్తిని అడిగి తెలుసుకున్నారు.

విద్యార్థులకు చట్టాలపై అవగాహన కల్పించడం ద్వారా భవిష్యత్తులో వారు బాధ్యతాయుత పౌరులుగా ఎదుగుతారని నిర్వాహకులు తెలిపారు. ఇలాంటి సదస్సులను జిల్లా వ్యాప్తంగా మరిన్ని పాఠశాలల్లో నిర్వహిస్తామని డిఎల్ఎస్ఏ తెలిపింది.