prajavaani.net
Newspaper Banner
Date of Publish : 17 November 2026, 9:19 am Digital Edition : PRAJA VANI

ప్రభుత్వ భూములను కాపాడాలి – ప్రజా అవసరాలకు వినియోగించాలి

*ప్రభుత్వ భూములను కాపాడాలి – ప్రజా అవసరాలకు వినియోగించాలి*.

సర్వే నంబర్ 87లోని ప్రభుత్వ భూమిని అన్యాక్రాంతం కాకుండా కాపాడి,

ప్రజా ప్రయోజనాలకు వినియోగించాలి – జిల్లా కలెక్టర్ గారికి బీఎస్పీ విజ్ఞప్తి.

మంచిర్యాల,ప్రజావాణి రిపోర్టర్ నవంబర్ 17:

మంచిర్యాల జిల్లా కేంద్రంలోని పట్టణ పరిధిలో ఉన్న సర్వే నంబర్ 87లోని ప్రభుత్వ భూమిని ప్రభుత్వ ఆధీనంలోకి తీసుకొని, ప్రజా అవసరాలకు మరియు ప్రభుత్వ ఆదాయాభివృద్ధికి ఉపయోగపడే విధంగా చర్యలు చేపట్టాలని బహుజన్ సమాజ్ పార్టీ (BSP) పెద్దపల్లి పార్లమెంట్ ఇంచార్జ్ కాదాసి రవీందర్ గారు మరియు మంచిర్యాల జిల్లా అధ్యక్షులు ముల్కల్ల రాజేంద్ర ప్రసాద్ గారు జిల్లా కలెక్టర్ గారిని కోరారు.
మంచిర్యాల పట్టణంలో ప్రభుత్వానికి చెందిన విలువైన భూములు ప్రజా ప్రయోజనాలకు ఉపయోగపడాల్సి ఉండగా, వాటి పరిరక్షణపై తగిన శ్రద్ధ చూపాల్సిన అవసరం ఉందని ఆయన పేర్కొన్నారు. ముఖ్యంగా సర్వే నంబర్ 87లో ఉన్న ప్రభుత్వ భూమి విషయంలో సంబంధిత అధికారులు ప్రత్యేక దృష్టి సారించాలని విజ్ఞప్తి చేశారు.
సదరు ప్రభుత్వ భూమిలో ప్రస్తుతం A1 హోటల్ ప్రక్కన కొనసాగుతున్నట్లు తెలుస్తోందని, ఈ భూమికి సంబంధించిన వివాదాలు కోర్టులో ఉన్నట్లు సమాచారం ఉందని తెలిపారు. కోర్టు కేసుల పరిష్కారం కాకముందే కొందరు వ్యక్తులు ఈ భూమిని అన్యాక్రాంతం చేసుకునేందుకు ప్రయత్నిస్తూ, బ్లూ షీట్లు ఏర్పాటు చేయడం వంటి చర్యలకు పాల్పడుతున్నట్లు తమ దృష్టికి వచ్చిందని పేర్కొన్నారు. ఇలాంటి పరిణామాలు భవిష్యత్తులో ప్రభుత్వ భూముల పరిరక్షణకు ఇబ్బందులు కలిగించే అవకాశం ఉందని ఆందోళన వ్యక్తం చేశారు.

ప్రభుత్వానికి చెందిన భూములను కొంతమంది వ్యక్తుల స్వప్రయోజనాల కోసం కాకుండా, సమాజంలోని అన్ని వర్గాల ప్రజలకు ఉపయోగపడేలా వినియోగించాల్సిన బాధ్యత ప్రభుత్వ యంత్రాంగంపై ఉందన్నారు. ప్రభుత్వ ఆస్తులను కాపాడటం మాత్రమే కాకుండా, వాటిని ప్రజలకు మేలు చేసే అభివృద్ధి కార్యక్రమాలకు వినియోగించడం ద్వారా ప్రభుత్వానికి ఆదాయం సమకూరడంతో పాటు స్థానిక ప్రజలకు ఉపాధి అవకాశాలు కూడా కల్పించవచ్చని తెలిపారు.

ఈ నేపథ్యంలో సర్వే నంబర్ 87లోని ప్రభుత్వ భూమిపై అధికారులు ప్రత్యేక విచారణ జరిపి, కింది చర్యలు చేపట్టాలని బహుజన్ సమాజ్ పార్టీ డిమాండ్ చేస్తోంది.

1) అంబేద్కర్ స్టడీ సెంటర్ ఏర్పాటు: సర్వే నంబర్ 87లోని ప్రభుత్వ భూమిలో డాక్టర్ బి.ఆర్. అంబేద్కర్ స్టడీ సెంటర్‌ను ఏర్పాటు చేసి, పేద, బడుగు, బలహీన వర్గాల విద్యార్థులకు పోటీ పరీక్షల శిక్షణ, గ్రంథాలయ సౌకర్యాలు అందుబాటులోకి తీసుకురావాలి.
2) చిరు వ్యాపారులకు దుకాణాల ఏర్పాటు: పట్టణంలోని చిరు వ్యాపారులు, నిరుపేద కుటుంబాలకు చెందిన వారికి చిన్న చిన్న దుకాణాలు ఏర్పాటు చేసి, వారి జీవనోపాధికి శాశ్వత మార్గం కల్పించాలి. తద్వారా స్వయం ఉపాధిని ప్రోత్సహించి ఆర్థికంగా వెనుకబడిన కుటుంబాలకు అండగా నిలవాలి.
3) ప్రజా అవసరాలకు ఉపయోగపడే నిర్మాణాలు: స్థానిక ప్రజల అవసరాలను దృష్టిలో ఉంచుకొని తగిన అభివృద్ధి నిర్మాణాలు చేపట్టాలి. వాటి ద్వారా నిరుద్యోగ యువతకు ఉపాధి అవకాశాలు కల్పించడంతో పాటు, ప్రభుత్వానికి కూడా ఆదాయం సమకూరే విధంగా ప్రణాళికలు రూపొందించాలి.
4) ప్రభుత్వ భూమికి హద్దుల నిర్ధారణ: సర్వే నంబర్ 87లోని ప్రభుత్వ భూమిని సంబంధిత రెవెన్యూ అధికారులు క్షేత్రస్థాయిలో పరిశీలించి, సర్వే నిర్వహించి, ప్రభుత్వ భూమి సరిహద్దులను గుర్తించి హద్దురాళ్లు ఏర్పాటు చేయాలి.
5) అక్రమ ఆక్రమణలపై చర్యలు: ప్రభుత్వ భూమిని ఆక్రమించేందుకు ప్రయత్నిస్తున్న వ్యక్తుల వివరాలను పరిశీలించి, చట్టపరంగా తగిన చర్యలు తీసుకోవాలి. కోర్టులో ఉన్న కేసుల స్థితిగతులను పరిశీలించి, న్యాయపరమైన ప్రక్రియకు అనుగుణంగా ప్రభుత్వ భూమిని పరిరక్షించాలి.

మంచిర్యాల పట్టణ అభివృద్ధికి ప్రభుత్వ భూములు ఎంతో కీలకమైనవని, వాటిని రక్షించుకోవడం ప్రతి ఒక్కరి బాధ్యత అని ముల్కల్ల రాజేంద్ర ప్రసాద్ గారు పేర్కొన్నారు. ప్రభుత్వ భూములు అన్యాక్రాంతమైతే భవిష్యత్తులో ప్రజా అవసరాల కోసం స్థలం లభించని పరిస్థితి ఏర్పడుతుందని అన్నారు.

బహుజన్ సమాజ్ పార్టీ (BSP) ఎల్లప్పుడూ పేదలు, బడుగు బలహీన వర్గాలు, నిరుపేద కుటుంబాలు, చిరు వ్యాపారులు, నిరుద్యోగ యువత మరియు అణగారిన వర్గాల హక్కుల కోసం పోరాడుతుందని తెలిపారు.

అన్ని పార్టీలకు అతీతంగా ప్రజా ప్రయోజనాలే ప్రధాన లక్ష్యంగా ఈ ప్రభుత్వ భూమిని కాపాడి, అంబేద్కర్ స్టడీ సెంటర్‌తో పాటు ప్రజలకు ఉపయోగపడే అభివృద్ధి కార్యక్రమాలకు కేటాయించాలని బహుజన్ సమాజ్ పార్టీ డిమాండ్ చేస్తోంది.

కావున జిల్లా కలెక్టర్ గారు ఈ విషయంపై తక్షణమే స్పందించి, సంబంధిత అధికారులతో సమగ్ర విచారణ జరిపించి, సర్వే నంబర్ 87లోని ప్రభుత్వ భూమిని పరిరక్షించి ప్రజా ప్రయోజనాలకు వినియోగించేలా తగిన చర్యలు తీసుకోవాలని బహుజన్ సమాజ్ పార్టీ మంచిర్యాల జిల్లా కమిటీ తరఫున విజ్ఞప్తి చేస్తున్నాము.

ఈ కార్యక్రమం లో బహుజన్ సమాజ్ పార్టీ పెద్దపల్లి పార్లమెంట్ ఇంచార్జి కాదాసి రవీందర్,మంచిర్యాల జిల్లా అధ్యక్షులు ముల్కల్ల రాజేంద్రప్రసాద్, EC మెంబర్ MD మాతిన్ ఖాన్,మంచిర్యాల నియోజకవర్గ ఇన్చార్జ్ పెట్టం చంద్రశేఖర్, మంచిర్యాల నియోజకవర్గం అధ్యక్షులు బండారి రాజ్ కుమార్,చెన్నూర్ నియోజకవర్గం ఇంచార్జి దుర్గం గంగారాం,నియోజకవర్గం అధ్యక్షులు గాజుల శంకర్, మందమర్రి మండలం అధ్యక్షులు Md రహీం బాబా, నాయకులు చింతల సంతోష్, తదితరులు పాల్గొన్నారు.