prajavaani.net
Newspaper Banner
Date of Publish : 16 November 2026, 11:55 am Digital Edition : PRAJA VANI

ప్రజల భద్రతే లక్ష్యంగా హసన్‌పర్తి పోలీసుల ఇంటింటికీ అవగాహన కార్యక్రమం

ప్రజల భద్రతే లక్ష్యంగా హసన్‌పర్తి పోలీసుల ఇంటింటికీ అవగాహన కార్యక్రమం!

సైబర్ నేరాలు, డిజిటల్ అరెస్టు మోసాలపై ప్రజలకు హెచ్చరిక.. సీసీ కెమెరాల ఏర్పాటుకు పిలుపు

హసన్‌పర్తి, నవంబర్ 16, (మన ప్రజావాణి):

శాంతిభద్రతల పరిరక్షణ, ప్రజల భద్రతే లక్ష్యంగా హసన్‌పర్తి పోలీసులు ప్రత్యేక అవగాహన కార్యక్రమానికి శ్రీకారం చుట్టారు. వరంగల్ పోలీస్ కమిషనరేట్ పరిధిలోని హసన్‌పర్తి పోలీస్ స్టేషన్ ఆధ్వర్యంలో ఆదివారం ఆదర్శ్ నగర్ ప్రాంతంలో ‘డోర్ టు డోర్ కమ్యూనిటీ కనెక్ట్’ కార్యక్రమాన్ని విస్తృతంగా నిర్వహించారు. హసన్‌పర్తి పోలీస్ స్టేషన్ ఇన్‌స్పెక్టర్ ఎ. మహేందర్ నేతృత్వంలో పోలీస్ సిబ్బంది కాలనీలోని ప్రతి ఇంటిని సందర్శించి స్థానికులతో మాట్లాడి పలు అంశాలపై అవగాహన కల్పించారు.

సైబర్ నేరాలపై అప్రమత్తంగా ఉండాలి

ఆన్‌లైన్ మోసాలు, నకిలీ లాటరీ లింకులు, ఇంటర్నెట్ బ్యాంకింగ్ మోసాల పట్ల ప్రజలు అప్రమత్తంగా ఉండాలని ఇన్‌స్పెక్టర్ సూచించారు. అపరిచిత వ్యక్తులకు ఓటీపీలు, బ్యాంకు ఖాతా వివరాలు, వ్యక్తిగత సమాచారాన్ని ఎట్టి పరిస్థితుల్లోనూ వెల్లడించవద్దని హెచ్చరించారు. అదేవిధంగా పోలీసులమని, ఇతర ప్రభుత్వ అధికారులమని బెదిరిస్తూ డబ్బులు వసూలు చేసే డిజిటల్ అరెస్ట్ మోసాల పట్ల జాగ్రత్తగా ఉండాలని సూచించారు.

ఇళ్ల భద్రతకు సీసీ కెమెరాలు ఏర్పాటు చేసుకోవాలి

ఇళ్లకు తాళాలు వేసి బయటకు వెళ్లే సమయంలో తగిన జాగ్రత్తలు తీసుకోవాలని, కాలనీల్లో అనుమానాస్పద వ్యక్తులు కనిపిస్తే వెంటనే పోలీసులకు సమాచారం అందించాలని కోరారు. నేరాల నియంత్రణకు, నిందితులను గుర్తించేందుకు సీసీటీవీ కెమెరాలు ఎంతో ఉపయోగపడతాయని, ప్రతి ఇంటి వద్ద, వ్యాపార సముదాయాల వద్ద నిఘా కెమెరాలు ఏర్పాటు చేసుకోవాలని పిలుపునిచ్చారు.

మత్తు పదార్థాలకు యువత దూరంగా ఉండాలి

యువత గంజాయి, డ్రగ్స్ వంటి మత్తు పదార్థాలకు దూరంగా ఉండాలని ఇన్‌స్పెక్టర్ సూచించారు. గంజాయి, మత్తు పదార్థాల విక్రయాలు లేదా రవాణా గురించి సమాచారం తెలిసిన వారు నిర్భయంగా పోలీసులకు తెలియజేయాలని, సమాచారం ఇచ్చిన వారి వివరాలను గోప్యంగా ఉంచుతామని భరోసా ఇచ్చారు.

అత్యవసర పరిస్థితుల్లో 112కు ఫోన్ చేయాలి

ప్రజలకు ఏదైనా ఆపద లేదా అత్యవసర పరిస్థితి ఎదురైతే వెంటనే జాతీయ అత్యవసర హెల్ప్‌లైన్ నంబర్ 112కు ఫోన్ చేసి పోలీసుల సహాయం పొందాలని వివరించారు.

ఈ కార్యక్రమానికి కాలనీవాసులు సానుకూలంగా స్పందించి పోలీసులకు తమ పూర్తి సహకారం అందిస్తామని తెలిపారు. ఈ కార్యక్రమంలో హసన్‌పర్తి పోలీస్ స్టేషన్ సిబ్బంది, ఆదర్శ్ నగర్ కాలనీవాసులు పాల్గొన్నారు.