prajavaani.net
Newspaper Banner
Date of Publish : 15 November 2026, 7:37 am Digital Edition : MADHUBABU ANDRAPRADESH

బద్వేల్ నియోజకవర్గంలో నేటి నుంచి సర్పంచ్ నామినేషన్ల సందడి

నామినేషన్ కేంద్రాల వద్ద పటిష్ట పోలీసు బందోబస్తు.. 144 సెక్షన్ అమలు.. అవాంఛనీయ ఘటనలకు పాల్పడితే కఠిన చర్యలు తప్పవని పోలీసుల హెచ్చరిక

కలసపాడు,నవంబర్ 15 ప్రజావాణి బద్వేల్ నియోజకవర్గంలోని కలసపాడు మండలంలో స్థానిక సంస్థల ఎన్నికల కోలాహలం మొదలైంది. ఆదివారం ఉదయం నుంచి సర్పంచ్, వార్డు సభ్యుల స్థానాలకు అభ్యర్థుల నామినేషన్ల స్వీకరణ ప్రక్రియ అధికారికంగా ప్రారంభమైంది. గ్రామ పంచాయతీ ఎన్నికల నేపథ్యంలో మండలంలోని ప్రధాన కేంద్రాలైన రాజుపాలెం, కలసపాడు, శంఖవరం నామినేషన్ స్వీకరణ కేంద్రాల వద్ద ఎలాంటి అవాంఛనీయ ఘటనలు జరగకుండా పోలీసు శాఖ భారీ ఎత్తున పటిష్ట బందోబస్తు ఏర్పాటు చేసింది.నామినేషన్ల ప్రక్రియ తొలిరోజు కావడంతో ఆశావహులు, వారి మద్దతుదారులు పెద్ద ఎత్తున కేంద్రాల వద్దకు చేరుకునే అవకాశం ఉండటంతో పోలీసులు ముందస్తు జాగ్రత్తలు చేపట్టారు. బద్వేల్ రూరల్ సీఐ హాజీవలి ఆధ్వర్యంలో కలసపాడు ఎస్సై హనుమంతు, ఇతర మండలాల నుంచి వచ్చిన ఎస్సైలు చిరంజీవి, యోగేంద్ర, మహమ్మద్ రఫీతో పాటు భారీ సంఖ్యలో పోలీసు సిబ్బంది బందోబస్తు విధుల్లో నిమగ్నమయ్యారు.

కేంద్రాల వద్ద కట్టుదిట్టమైన ఆంక్షలు:

నామినేషన్ కేంద్రాలకు 100 మీటర్ల పరిధిలో 144 సెక్షన్ అమలులో ఉంటుందని పోలీసులు స్పష్టం చేశారు. రిటర్నింగ్ అధికారి కార్యాలయంలోకి అభ్యర్థితో పాటు పరిమిత సంఖ్యలో ప్రతిపాదకులను మాత్రమే అనుమతిస్తున్నారు. కేంద్రాల వద్ద బారికేడ్లు ఏర్పాటు చేసి, ఇతరులు లోపలికి ప్రవేశించకుండా తనిఖీలు నిర్వహిస్తున్నారు.

క్రిమినల్ కేసులు తప్పవు – ఎస్సై హనుమంతు హెచ్చరిక:

ఈ సందర్భంగా కలసపాడు ఎస్సై హనుమంతు మాట్లాడుతూ.నామినేషన్ల ప్రక్రియ అత్యంత ప్రశాంతంగా, పారదర్శకంగా, ఎన్నికల నిబంధనలకు లోబడి జరిగేలా ప్రత్యేక చర్యలు చేపట్టినట్లు తెలిపారు. అభ్యర్థులు ఎలాంటి భయాందోళనలు లేకుండా, ప్రశాంత వాతావరణంలో నామినేషన్లు దాఖలు చేసుకునేందుకు పోలీసు శాఖ పూర్తి సహకారం అందిస్తుందని పేర్కొన్నారు. అయితే, నామినేషన్ కేంద్రాల వద్ద అనవసరపు గుంపులుగా చేరడం, రెచ్చగొట్టే వ్యాఖ్యలు చేయడం, ర్యాలీలు నిర్వహించడం లేదా ఘర్షణలకు పాల్పడటం వంటివి చేస్తే ఎట్టి పరిస్థితుల్లోనూ ఉపేక్షించేది లేదని ఆయన స్పష్టం చేశారు. నిబంధనలు ఉల్లంఘించిన వారిపై కఠిన చర్యలు తీసుకోవడంతో పాటు, వెంటనే క్రిమినల్ కేసులు నమోదు చేస్తామని హెచ్చరించారు. మండలంలోని అన్ని రాజకీయ పార్టీల నాయకులు, అభ్యర్థులు, గ్రామస్తులు ఎన్నికల కోడ్‌ను గౌరవిస్తూ పోలీసులకు సహకరించాలని కోరారు.