ప్రభుత్వ బాలుర వసతి గృహ విద్యార్థులకు దోమతెరల పంపిణీ

కడప : ప్రజావాణి నవంబర్ (12)
ప్రభుత్వ బాలుర వసతి గృహ విద్యార్థులకు దోమతెరల పంపిణీ

ప్రకాశ్ నగర్‌లోని ప్రభుత్వ బాలుర వసతి గృహం నంబర్‌–1లో విద్యార్థుల ఆరోగ్య పరిరక్షణే లక్ష్యంగా దోమతెరల పంపిణీ కార్యక్రమం నిర్వహించారు. ఈ కార్యక్రమంలో ASWO లక్ష్మీనారాయణ, HWO హరికృష్ణ పాల్గొని వసతి గృహంలో ఉంటున్న విద్యార్థులకు దోమతెరలను పంపిణీ చేశారు.

వసతి గృహాల్లో నివసించే విద్యార్థులు దోమల కారణంగా అనారోగ్య సమస్యలకు గురికాకుండా ముందస్తు జాగ్రత్తలు తీసుకోవాలనే ఉద్దేశంతో ఈ కార్యక్రమాన్ని చేపట్టారు. ముఖ్యంగా దోమల ద్వారా వ్యాపించే మలేరియా, డెంగ్యూ వంటి వ్యాధుల నుంచి విద్యార్థులను రక్షించేందుకు దోమతెరలు ఎంతగానో ఉపయోగపడతాయని ASWO లక్ష్మీనారాయణ తెలిపారు.

ఈ సందర్భంగా ASWO లక్ష్మీనారాయణ విద్యార్థులతో మాట్లాడుతూ, వ్యక్తిగత పరిశుభ్రతతో పాటు పరిసరాల పరిశుభ్రతకు ప్రాధాన్యత ఇవ్వాలని సూచించారు. రాత్రి నిద్రించే సమయంలో తప్పనిసరిగా దోమతెరలను ఉపయోగించాలని, ఆరోగ్య పరిరక్షణ విషయంలో నిర్లక్ష్యం చేయకూడదని తెలిపారు.

విద్యార్థుల సంక్షేమం, ఆరోగ్యం పట్ల ప్రత్యేక శ్రద్ధ చూపిస్తూ అవసరమైన సౌకర్యాలు కల్పించడం అభినందనీయమని పేర్కొన్నారు. దోమతెరల పంపిణీతో విద్యార్థులకు ఆరోగ్య భద్రత కల్పించడమే కాకుండా, దోమల బెడద నుంచి కొంత ఉపశమనం లభించనుంది.

ఈ కార్యక్రమంలో వసతి గృహ అధికారులు, సిబ్బంది, విద్యార్థులు పాల్గొన్నారు.