బేతుపల్లి చెరువులో సహాయక చర్యలు విజయవంతం.. అందరూ క్షేమం!

బేతుపల్లి చెరువులో సహాయక చర్యలు విజయవంతం.. అందరూ క్షేమం!

గల్లంతైన ఆరుగురు మత్స్యకారులతో పాటు ప్రమాదంలో చిక్కుకున్న ఆరుగురు SDRF, నలుగురు అగ్నిమాపక సిబ్బందిని సురక్షితంగా రక్షించిన NDRF బృందం

సత్తుపల్లి, నవంబర్ 5 (ప్రజావాణి):

ఖమ్మం జిల్లా సత్తుపల్లి మండలంలోని బేతుపల్లి చెరువులో చోటుచేసుకున్న ప్రమాద ఘటనలో సహాయక చర్యలు విజయవంతమయ్యాయి. చెరువులో గల్లంతైన ఆరుగురు మత్స్యకారులతో పాటు, సహాయక చర్యల్లో భాగంగా ప్రమాదంలో చిక్కుకున్న ఆరుగురు SDRF సిబ్బంది, నలుగురు అగ్నిమాపక శాఖ సిబ్బందిని NDRF బృందం సురక్షితంగా రక్షించింది. దీంతో ఈ ఘటనలో చిక్కుకున్న వారందరూ క్షేమంగా బయటపడటంతో స్థానికంగా ఊరట లభించింది.

బేతుపల్లి చెరువు వద్ద సహాయక చర్యలు కొనసాగుతున్న సమయంలో పరిస్థితిని అధికారులు ఎప్పటికప్పుడు సమీక్షించారు. బాధితుల ప్రాణాలను కాపాడేందుకు NDRF, SDRF, అగ్నిమాపక శాఖ సిబ్బంది సమన్వయంతో నిరంతరం శ్రమించారు. ప్రమాద తీవ్రతను దృష్టిలో ఉంచుకుని సహాయక చర్యలను వేగవంతం చేశారు.

ఈ సందర్భంగా సత్తుపల్లి ఎమ్మెల్యే డాక్టర్ మట్టా రాగమయి దయానంద్ సహాయక చర్యలను ప్రత్యక్షంగా పర్యవేక్షిస్తూ, బాధితుల ప్రాణాలను కాపాడేందుకు ప్రత్యేక చొరవ చూపారు. ఆమె చూపిన అంకితభావం, నిరంతర పర్యవేక్షణ పట్ల స్థానిక ప్రజలు, మత్స్యకారులు, వారి కుటుంబ సభ్యులు హర్షం వ్యక్తం చేశారు. ఎమ్మెల్యేతో పాటు రాష్ట్ర ప్రభుత్వానికి ప్రత్యేక కృతజ్ఞతలు తెలిపారు.

సహాయక చర్యలు వేగవంతంగా కొనసాగేందుకు ఖమ్మం జిల్లా కలెక్టర్, పోలీసు అధికారులు పరిస్థితిని ఎప్పటికప్పుడు సమీక్షిస్తూ అవసరమైన యంత్రాంగాన్ని సమకూర్చారు. బాధితులను సురక్షితంగా బయటకు తీసుకువచ్చేందుకు అధికారులు, సహాయక బృందాలు సమష్టిగా కృషి చేశారు. ఈ సందర్భంగా జిల్లా అధికారులకు స్థానిక ప్రజలు, మత్స్యకారుల కుటుంబ సభ్యులు ప్రత్యేక ధన్యవాదాలు తెలిపారు.

ఈ ఘటనపై ప్రత్యేక చొరవ చూపిస్తూ సహాయక చర్యలకు అవసరమైన అన్ని ఏర్పాట్లు చేయించిన ముఖ్యమంత్రి రేవంత్ రెడ్డికి ఎమ్మెల్యే డాక్టర్ మట్టా రాగమయి దయానంద్, సహాయక సిబ్బంది, మత్స్యకారుల కుటుంబ సభ్యులు ప్రత్యేక కృతజ్ఞతలు తెలిపారు.

ప్రాణాలను కాపాడటమే లక్ష్యంగా ప్రతికూల పరిస్థితుల్లోనూ ధైర్యంగా, సమన్వయంతో పనిచేసి సహాయక చర్యలను విజయవంతం చేసిన NDRF, SDRF, అగ్నిమాపక శాఖ సిబ్బందికి పలువురు హృదయపూర్వక అభినందనలు తెలిపారు.