• సురేష్ నాయుడు ఆధ్వర్యంలో,బిజెపి యువ మోర్చా రాష్ట్ర నాయకులు బుసిరెడ్డి మనోహర్ రెడ్డి అధ్యక్షతన ఘనంగా నిర్వహణ.
• కూటమి భాగస్వామ్యంతో ప్రతి స్థానంలోనూ పోటీకి సిద్ధమన్న శ్రేణులు
కాశినాయన అక్టోబర్ 10 ప్రజావాణి వైఎస్సార్ కడప జిల్లా బద్వేల్ నియోజకవర్గ పరిధిలోని కాశినాయన మండలం, సావిశెట్టిపల్లి గ్రామంలో భారతీయ జనతా పార్టీ (బీజేపీ) ఆధ్వర్యంలో చేపట్టిన ‘మన ఊరు – మన జెండా’ కార్యక్రమం ఆదివారం అత్యంత వైభవంగా, శ్రేణుల ఉత్సాహం నడుమ నిర్వహించబడింది. రాబోయే స్థానిక సంస్థల ఎన్నికలను దృష్టిలో ఉంచుకుని క్షేత్రస్థాయి నుంచి పార్టీ పునాదులను పటిష్టం చేయడమే ప్రధాన లక్ష్యంగా కార్యక్రమాన్ని ఏర్పాటు చేశారు.ఈ కార్యక్రమంలో సురేష్ నాయుడు నేతృత్వంలో నిర్వహించగా,బిజెపి యువ మోర్చా రాష్ట్ర కార్యవర్గ సభ్యులు బుసిరెడ్డి మనోహర్ రెడ్డి అధ్యక్షత వహించారు.ముందుగా గ్రామంలో పార్టీ నాయకులు, కార్యకర్తలు భారీ ర్యాలీ నిర్వహించి, నినాదాలతో హోరెత్తించారు.అనంతరం గ్రామ కూడలిలో బీజేపీ పతాకాన్ని అగ్రనేతలు ఘనంగా ఆవిష్కరించారు. ఈ వేదికకు ముఖ్య అతిథులుగా బీజేపీ జిల్లా ప్రధాన కార్యదర్శి ఉట్టి శ్రీనివాసులు, కిసాన్ మోర్చా జిల్లా అధ్యక్షుడు అశోక్ కుమార్ రెడ్డి,బిజెపి యువ మోర్చా రాష్ట్ర కార్యవర్గ సభ్యులు బుసిరెడ్డి మనోహర్ రెడ్డి,బిజెపి మండల అధ్యక్షుడు బిజీవేముల నారాయణరెడ్డి విచ్చేసి కార్యకర్తలకు మార్గదర్శనం చేశారు.సభలో ముఖ్య అతిథులు మాట్లాడుతూ, త్వరలో జరగబోయే పంచాయతీ, ఎంపీటీసీ, జడ్పీటీసీ ఎన్నికల్లో బీజేపీ చురుకైన పాత్ర పోషిస్తుందని స్పష్టం చేశారు. రాష్ట్ర నాయకత్వం ఆదేశాల ప్రకారం కాశినాయన మండలంలోని కొన్ని స్థానాల్లో కాదు.ప్రతి గ్రామం, వార్డు, ఎంపీటీసీ స్థానాల్లోనూ పోటీ చేసేందుకు పార్టీ శ్రేణులు సన్నద్ధంగా ఉన్నాయని ప్రకటించారు. మండలంలో బీజేపీకి బలమైన క్షేత్రస్థాయి యంత్రాంగం ఉందని, ప్రజాదరణ కలిగిన అభ్యర్థులను రంగంలోకి దింపి స్థానిక సంస్థల ఎన్నికల్లో క్లీన్ స్వీప్ చేయడమే లక్ష్యంగా అడుగులు వేస్తున్నామని వారు ధీమా వ్యక్తం చేశారు. ఎన్డీయే (NDA) కూటమి భాగస్వామ్యంతో మండలంలోని అన్ని స్థానాల్లో విజయకేతనం ఎగురవేస్తామని స్పష్టం చేశారు.
కేంద్ర నిధులతోనే గ్రామాల సమగ్ర వికాసం: ఉట్టి శ్రీనివాసులు
బీజేపీ జిల్లా ప్రధాన కార్యదర్శి ఉట్టి శ్రీనివాసులు మాట్లాడుతూ, కేంద్రంలోని ఎన్డీయే ప్రభుత్వం గ్రామీణ స్వపరిపాలనకు, మౌలిక వసతుల కల్పనకు అత్యధిక ప్రాధాన్యత ఇస్తోందని వివరించారు.14వ,15వ ఆర్థిక సంఘం నిధుల ద్వారా గ్రామ పంచాయతీలకు నేరుగా కోట్ల రూపాయలు మంజూరవుతున్నాయని, వాటి వల్లే గ్రామాల్లో సీసీ రోడ్ల నిర్మాణం,తాగునీటి సరఫరా,ఎల్‌ఈడీ వీధి దీపాలు, డ్రైనేజీ వ్యవస్థల విస్తరణ సాధ్యమవుతోందని తెలిపారు. కేంద్ర ప్రభుత్వం అందిస్తున్న ఉచిత రేషన్, ఆయుష్మాన్ భారత్, జల జీవన్ మిషన్ వంటి చారిత్రక పథకాలను గ్రామాల్లోని ప్రతి గడపకూ తీసుకెళ్లాల్సిన బాధ్యత కార్యకర్తలపై ఉందని చెప్పారు. కార్యక్రమ నిర్వాహకులు సురేష్ నాయుడు మాట్లా,డుతూ, సావిశెట్టిపల్లి గ్రామంలో బీజేపీకి ప్రజల నుంచి అపూర్వ మద్దతు లభిస్తోందని, గ్రామ సమస్యల పరిష్కారానికి ఎల్లప్పుడూ ముందుంటామని అన్నారు.
యువతరం మార్పునకు నాంది పలకాలి: బసిరెడ్డి మనోహర్ రెడ్డి
బీజేవైఎం రాష్ట్ర సభ్యులు బుసిరెడ్డి మనోహర్ రెడ్డి మాట్లాడుతూ,రాజకీయాల్లో యువత పాత్ర కీలకమని పేర్కొన్నారు.గ్రామాల్లోని యువత బీజేపీ సిద్ధాంతాలకు ఆకర్షితులై ముందుకు వస్తున్నారని, గ్రామీణ ప్రాంతాల స్వయం సమృద్ధి కోసం యువత నడుం బిగించాలని పిలుపునిచ్చారు. ప్రధాని మోదీ ప్రవేశపెట్టిన స్టార్టప్ పథకాలు, ముద్ర రుణాలు,నైపుణ్యాభివృద్ధి కార్యక్రమాల ద్వారా గ్రామీణ యువత సొంత కాళ్లపై నిలబడేలా పార్టీ కార్యకర్తలు అవగాహన కల్పించాలని దిశానిర్దేశం చేశారు.
రైతులకు అండగా మోదీ సర్కార్: అశోక్ కుమార్ రెడ్డి
కిసాన్ మోర్చా జిల్లా అధ్యక్షుడు అశోక్ కుమార్ రెడ్డి ప్రసంగిస్తూ, ప్రధానమంత్రి నరేంద్ర మోదీ ప్రభుత్వం అన్నదాతల సంక్షేమానికి పెద్దపీట వేస్తోందని తెలిపారు. పీఎం కిసాన్ సమ్మాన్ నిధి, సూక్ష్మ సేద్యానికి సబ్సిడీలు, పంటల బీమా వంటి అనేక సంస్కరణలతో వ్యవసాయ రంగాన్ని లాభసాటిగా మారుస్తున్నారని పేర్కొన్నారు.జ సావిశెట్టిపల్లి పరిసర ప్రాంత రైతాంగానికి సాగునీరు, ఎరువులు,విత్తనాల సమస్యలు రాకుండా బీజేపీ శ్రేణులు నిరంతరం అండగా నిలుస్తాయని హామీ ఇచ్చారు.మండల అధ్యక్షుడు బిజీవేముల నారాయణ రెడ్డి మాట్లాడుతూ, మండల వ్యాప్తంగా ఉన్న అన్ని బూత్ కమిటీలను బలోపేతం చేసి ఎన్నికల్లో కూటమి ప్రభుత్వానికి కార్యకర్తలు సైనికుల్లా కృషి చేయాలని పిలుపునిచ్చారు.ఈ కార్యక్రమంలో బిజెపి బి ఎల్ ఎ వన్ బిజీవేముల భాస్కర్ రెడ్డి,బిజెపి మండల ప్రధాన కార్యదర్శి ఎదురు భాస్కర్ రెడ్డి,బీజేపీ కిసాన్ మోర్చ మండల అధ్యక్షుడు ఎదురు నాగార్జున రెడ్డి, బిజెపి బద్వేల్ రూరల్ అధ్యక్షుడు సుబ్బారెడ్డి ,బిజెపి సీనియర్ నాయకులు సుధాకర్ రెడ్డి, గ్రామ స్థాయి నాయకులు, ప్రతినిధులు,పెద్ద సంఖ్యలో పార్టీ కార్యకర్తలు,గ్రామ ప్రముఖులు,యువకులు మరియు మహిళలు విశేషంగా పాల్గొన్నారు.