శంకరాజుపల్లిలో అభివృద్ధి పనుల జోరు

శంకరాజుపల్లిలో అభివృద్ధి పనుల జోరు.. కేకే గూడెం కాలనీలో డ్రైనేజీ పనులు ప్రారంభం.
సీఎం రేవంత్ రెడ్డి, మంత్రి సీతక్క సహకారంతో గ్రామాభివృద్ధికి పెద్దపీట.

ఏటూరునాగారం అక్టోబరు 23 ప్రజావాణి:

ములుగు జిల్లా ఏటూరునాగారం మండలం శంకరాజుపల్లి గ్రామంలో అభివృద్ధి పనులు ముమ్మరంగా కొనసాగుతున్నాయి. ముఖ్యమంత్రి రేవంత్ రెడ్డి, రాష్ట్ర మంత్రి ధనసరి అనసూయ సీతక్క సహకారంతో గ్రామంలో మౌలిక సదుపాయాల కల్పనకు ప్రాధాన్యతనిస్తూ వివిధ అభివృద్ధి కార్యక్రమాలను చేపడుతున్నారు. గ్రామ సర్పంచ్, మండల కాంగ్రెస్ పార్టీ అధ్యక్షుడు దేవులపల్లి విజయ్ కుమార్ ఆధ్వర్యంలో, 6వ వార్డు సభ్యురాలు తాటి శ్రీలత–నీలాద్రి సమక్షంలో కేకే గూడెం కాలనీలో డ్రైనేజీ పనులను ప్రారంభించారు. కాలనీలో మురుగునీటి సమస్యలను పరిష్కరించి, పారిశుద్ధ్యాన్ని మెరుగుపరిచేందుకు ఈ పనులు ఎంతగానో దోహదపడనున్నాయి. డ్రైనేజీ వ్యవస్థ మెరుగుపడటంతో స్థానిక ప్రజలకు ఇబ్బందులు తగ్గి, పరిసరాలు పరిశుభ్రంగా ఉండేందుకు అవకాశం కలగనుంది.శంకరాజుపల్లి గ్రామ అభివృద్ధి కోసం ఎస్సీఎస్డిఎఫ్సి అభివృద్ధి నిధుల కింద రూ.1.95 కోట్లు, ఐటీడీఏ నిధుల కింద రూ.50 లక్షలు కలిపి మొత్తం రూ.2.45 కోట్ల నిధులతో అభివృద్ధి పనులు చేపడుతున్నారు. గ్రామంలోని వివిధ ప్రాంతాల్లో అవసరమైన మౌలిక సదుపాయాలను కల్పించడంతో పాటు, ప్రజల సమస్యలను పరిష్కరించేందుకు అభివృద్ధి పనులకు ప్రాధాన్యత ఇస్తున్నారు. ప్రభుత్వ నిధులను సద్వినియోగం చేసుకుంటూ గ్రామాన్ని అభివృద్ధి పథంలో ముందుకు తీసుకెళ్లేందుకు కృషి చేస్తున్నట్లు స్థానిక నాయకులు తెలిపారు. గ్రామీణ ప్రాంతాల్లో మెరుగైన రహదారులు, డ్రైనేజీ వ్యవస్థ, పారిశుద్ధ్య సదుపాయాల కల్పనతో ప్రజల జీవన ప్రమాణాలు మెరుగుపడతాయని పేర్కొన్నారు. అభివృద్ధి పనులను నాణ్యతతో పూర్తి చేసి ప్రజలకు అందుబాటులోకి తీసుకురావడమే లక్ష్యంగా ముందుకు సాగుతున్నట్లు తెలిపారు. ఈ కార్యక్రమంలో గ్రామ పెద్దలు, కాంగ్రెస్ పార్టీ కార్యకర్తలు, స్థానిక నాయకులు, కాలనీవాసులు, తదితరులు పాల్గొన్నారు.