తుఫానుకు నేలకొరిగిన చేతికొచ్చిన పంట!
కష్టమంతా నేలపాలు.. రైతన్న ఆశలపై ప్రకృతి పంజా.. కంటతడి పెట్టిస్తున్న పంట నష్టం
గరిడేపల్లి (ప్రజావాణి):
రెక్కలు ముక్కలు చేసుకొని.. రేయింబవళ్లు శ్రమించి.. అప్పులు చేసి పెట్టుబడులు పెట్టి.. కంటికి రెప్పలా కాపాడుకుంటూ పండించిన పంట చేతికొచ్చే సమయానికి తుఫాను రూపంలో ప్రకృతి విరుచుకుపడింది. ఎన్నో ఆశలతో సాగు చేసిన పంట నేలకొరగడంతో అన్నదాత గుండె పగిలిపోతోంది. కళ్లముందే నెలల తరబడి పడిన కష్టం నేలపాలవుతుంటే రైతన్న కన్నీటిని ఆపుకోలేకపోతున్నాడు.
విత్తనం నాటిన నాటి నుంచి పంట ఎదిగే వరకు ఎన్నో కష్టనష్టాలను ఎదుర్కొన్నాడు. ఎండనక, వాననక పొలంలోనే గడిపాడు. పంట చేతికొస్తే అప్పులు తీర్చి కుటుంబాన్ని సంతోషంగా చూసుకోవచ్చని ఎన్నో కలలు కన్నాడు. కానీ తుఫాను బీభత్సానికి పంట నేలకొరగడంతో ఆ ఆశలన్నీ ఒక్కసారిగా ఆవిరైపోయాయి.
పంటను చూసి మురిసిపోవాల్సిన రైతన్న.. అదే పంట నేలకొరిగి కనిపిస్తుంటే గుండెలవిసేలా రోదిస్తున్నాడు. పెట్టుబడుల కోసం చేసిన అప్పులు ఒకవైపు.. చేతికి అందని పంట మరోవైపు.. కుటుంబ పోషణ ఎలా, అప్పులు ఎలా తీర్చాలనే ఆందోళనతో అన్నదాత తల్లడిల్లుతున్నాడు. ప్రకృతి ప్రకోపానికి బలైన తన రెక్కల కష్టాన్ని చూసి కన్నీరు పెట్టుకోవడం తప్ప ఏమి చేయలేని నిస్సహాయ స్థితిలో రైతు మిగిలిపోయాడు.
రైతన్న కష్టాన్ని గుర్తించి ప్రభుత్వం తక్షణమే స్పందించాలని బాధిత రైతులు కోరుతున్నారు. వ్యవసాయ అధికారులు క్షేత్రస్థాయిలో పర్యటించి పంట నష్టాన్ని అంచనా వేయాలని, నష్టపోయిన రైతులకు తగిన పరిహారం అందించి ఆదుకోవాలని విజ్ఞప్తి చేస్తున్నారు.
అన్నదాత చెమట చిందిస్తేనే అందరికీ అన్నం.. అలాంటి రైతన్న కంట కన్నీరు వస్తే సమాజం స్పందించక తప్పదు. తుఫాను దెబ్బకు నేలకొరిగిన పంటతో పాటు రైతన్న ఆశలు కూడా నేలపాలయ్యాయి. ఇప్పుడు ఆ రైతన్నను ఆదుకునేదెవరు? అతడి కన్నీళ్లు తుడిచేదెప్పుడు?