ఘనంగా దుర్గామాత శోభాయాత్ర ఊరేగింపు.
ఏటూరునాగారం అక్టోబరు 21 ప్రజావాణి:
శ్రీ సీతారామ చంద్రస్వామి ఆలయంలో ఏర్పాటు చేసిన
శ్రీదేవి శరన్నవరాత్రి మహోత్సవాల ముగింపు సందర్భంగా అమ్మవారి శోభాయాత్ర, ఊరేగింపు అత్యంత వైభవంగా, భక్తిశ్రద్ధల మధ్య నిర్వహించారు. నవరాత్రులంతా ప్రత్యేక పూజలు, అలంకరణలతో దేదీప్యమానంగా వెలిగిన అమ్మవారిని దివ్య సుందరంగా అలంకరించి భక్తులు వీధుల్లో ఊరేగించారు.
ఈ శోభాయాత్రలో మహిళలు, యువకులు, భక్తులు పెద్ద సంఖ్యలో ఉత్సాహంగా పాల్గొన్నారు. మంగళవాయిద్యాలు, భక్తుల నామస్మరణలు, కోలాటాలు మరియు జైకారాలతో పట్టణంలోని ప్రధాన వీధులన్నీ ఆధ్యాత్మికతతో మార్మోగాయి. భక్తులందరూ అమ్మవారికి కర్పూర హారతులు సమర్పించి, తమ కుటుంబాల చల్లని దీవెనలు కోరుతూ మొక్కులు చెల్లించుకున్నారు.
ఉత్సవ కమిటీ సభ్యులు మరియు స్థానికుల సహకారంతో కార్యక్రమం శాంతియుతంగా, కన్నులపండువగా ముగిసింది. ఊరేగింపు అనంతరం భక్తులకు తీర్థప్రసాదాలు అందజేశారు.