కాలగర్భంలో కలిసిపోతున్న పురాతన బంగ్లా

కాలగర్భంలో కలిసిపోతున్న పురాతన బంగ్లా
చరిత్రకు ఆనవాళ్లుగా నిలిచిన భవనానికి గుర్తింపు కరువు
దండేపల్లి, అక్టోబర్ 19 (ప్రజావాణి):
మంచిర్యాల జిల్లా దండేపల్లి మండలం లింగాపూర్ గ్రామపంచాయతీ పరిధిలో చారిత్రక నేపథ్యం కలిగిన పురాతన బంగ్లా కనుమరుగయ్యే పరిస్థితికి చేరుకుంది. బ్రిటిష్, నిజాం పాలనాకాలపు చారిత్రక ఆనవాళ్లుగా నిలిచిన ఈ భవనం సరైన గుర్తింపునకు నోచుకోకపోవడంతో కాలగర్భంలో కలిసిపోతోంది. ఒకప్పుడు గత వైభవానికి సాక్ష్యంగా నిలిచిన ఈ పురాతన కట్టడం నేడు నిర్లక్ష్యానికి గురవుతుండటం చరిత్రాభిమానులను ఆవేదనకు గురిచేస్తోంది.
స్థానికుల సమాచారం ప్రకారం, ఈ బంగ్లాను 1924లో నిర్మించారు. అప్పటి నిర్మాణ శైలికి అద్దం పట్టేలా బలమైన రాళ్లు, సున్నంతో ఈ భవనాన్ని నిర్మించినట్లు తెలుస్తోంది. నాటి నిర్మాణ నైపుణ్యానికి ప్రతీకగా నిలిచిన ఈ కట్టడం చారిత్రక ప్రాధాన్యతను కలిగి ఉంది.
చరిత్రను కాపాడాల్సిన బాధ్యత లేదా?
గత కాలపు చరిత్రను భవిష్యత్తు తరాలకు అందించాల్సిన ఇలాంటి పురాతన కట్టడాలు సరైన సంరక్షణ లేకపోవడంతో ఒక్కొక్కటిగా కనుమరుగవుతున్నాయి. చరిత్రకు సజీవ సాక్ష్యాలుగా నిలిచే ఈ భవనాలను గుర్తించి, వాటి ప్రాధాన్యతను వెలుగులోకి తీసుకురావాల్సిన అవసరం ఉంది.
సంబంధిత అధికారులు స్పందించి లింగాపూర్ గ్రామంలోని పురాతన బంగ్లాను పరిశీలించాలని, దాని చారిత్రక ప్రాధాన్యతను గుర్తించి సంరక్షణ చర్యలు చేపట్టాలని స్థానికులు కోరుతున్నారు. ఇప్పటికైనా ప్రభుత్వం, పురావస్తు శాఖ అధికారులు స్పందించి ఈ చారిత్రక కట్టడాన్ని కాపాడేందుకు చర్యలు తీసుకోవాలని చరిత్రాభిమానులు అభిప్రాయపడుతున్నారు.