ఉపాధ్యాయుల సేవలు సమాజానికి చిరస్మరణీయం
విద్యార్థుల భవిష్యత్తును తీర్చిదిద్దే గురువులకు గౌరవం ఇవ్వాలి: కాంగ్రెస్ పార్టీ యువ నాయకుడు విజయ్ కుమార్
మన ప్రజావాణి జుక్కల్ ఆర్ సి ప్రతినిధి అక్టోబర్ 05
ప్రపంచ ఉపాధ్యాయ దినోత్సవం సందర్భంగా జుక్కల్ గ్రామ కాంగ్రెస్ పార్టీ యువజన నాయకులు విజయ్ కుమార్ ఉపాధ్యాయులకు హృదయపూర్వక శుభాకాంక్షలు తెలిపారు.
ఈ సందర్భంగా ఆయన మాట్లాడుతూ, ఉపాధ్యాయులు కేవలం పాఠాలు బోధించే వారే కాకుండా విద్యార్థుల జీవితాలకు దిశానిర్దేశం చేసే మార్గదర్శకులు అని అన్నారు. విద్యార్థుల్లో జ్ఞానాన్ని పెంపొందించడంతో పాటు క్రమశిక్షణ, నైతిక విలువలు, బాధ్యతాయుతమైన పౌరులుగా ఎదిగే లక్షణాలను ఉపాధ్యాయులు పెంపొందిస్తున్నారని పేర్కొన్నారు.
ఒక మంచి ఉపాధ్యాయుడు ఒక విద్యార్థి జీవితాన్నే కాకుండా, ఆ విద్యార్థి ద్వారా సమాజ భవిష్యత్తును కూడా మార్చగలడని జుక్కల్ గ్రామ కాంగ్రెస్ పార్టీ యువజన నాయకులు విజయ్ కుమార్ అన్నారు. దేశ ప్రగతికి నాణ్యమైన విద్య ఎంతో అవసరమని, ఆ విద్యను అందించడంలో ఉపాధ్యాయుల పాత్ర అత్యంత కీలకమని తెలిపారు.
ఉపాధ్యాయుల సమస్యలను పరిష్కరించి, వారి వృత్తిపరమైన గౌరవాన్ని మరింత పెంచాల్సిన బాధ్యత సమాజంపై ఉందన్నారు. విద్యార్థుల భవిష్యత్తును తీర్చిదిద్దుతున్న ప్రతి ఉపాధ్యాయుడికి ఈ సందర్భంగా కృతజ్ఞతలు తెలుపుతున్నానని కాంగ్రెస్ పార్టీ 
నాయకులు విజయ్ కుమార్ పేర్కొన్నారు.
ప్రపంచ ఉపాధ్యాయ దినోత్సవం సందర్భంగా ప్రతి ఉపాధ్యాయుడికి నా హృదయపూర్వక శుభాకాంక్షలు. విద్యార్థుల జీవితాల్లో వెలుగులు నింపుతున్న గురువుల సేవలకు ఎల్లప్పుడూ సమాజం గౌరవం ఇవ్వాలి అని ఆయన సందేశం ఇచ్చారు.