*స్వచ్ఛత కోసం ఇంటింటికీ నాలుగు రకాల చెత్తబుట్టల పంపిణీ*
*గ్రామాన్ని పరిశుభ్రంగా తీర్చిదిద్దేందుకు ప్రజలు సహకరించాలి: సర్పంచ్ కృష్ణ మనోహరాబాద్ మండలం జీడిపల్లి గ్రామంలో స్వచ్ఛత కార్యక్రమంలో భాగంగా ఇంటింటికీ నాలుగు రకాల చెత్తబుట్టలను పంపిణీ చేస్తున్నట్లు గ్రామ సర్పంచ్ కృష్ణ తెలిపారు. గ్రామాన్ని పరిశుభ్రంగా ఉంచడంతో పాటు చెత్త నిర్వహణను మెరుగు పరిచేందుకు ఈ కార్యక్రమాన్ని చేపట్టినట్లు పేర్కొన్నారు.
ఈ సందర్భంగా సర్పంచ్ కృష్ణ మాట్లాడుతూ.. గ్రామంలోని ప్రతి ఇంటికి నాలుగు రకాల చెత్తబుట్టలను అందిస్తూ, చెత్తను వేర్వేరుగా సేకరించే విధానంపై ప్రజలకు అవగాహన కల్పిస్తున్నట్లు తెలిపారు. తడి చెత్త, పొడి చెత్తతో పాటు ఇతర వ్యర్థాలను నాలుగు రకాలుగా విభజించి, సంబంధిత చెత్తబుట్టల్లో వేయాలని సూచించారు.
ఇళ్ల పరిసరాల్లో చెత్తను రోడ్లపై పడేయకుండా, చెత్తబుట్టల్లోనే వేయడం ద్వారా గ్రామాన్ని పరిశుభ్రంగా ఉంచుకోవచ్చని అన్నారు. పరిసరాల పరిశుభ్రతతో ఆరోగ్యకరమైన వాతావరణం ఏర్పడుతుందని పేర్కొన్నారు. గ్రామంలో పారిశుద్ధ్య నిర్వహణకు ప్రతి ఒక్కరూ బాధ్యతగా వ్యవహరించాలని, స్వచ్ఛమైన జీడిపల్లి నిర్మాణానికి గ్రామస్తులందరూ సహకరించాలని కోరారు.
గ్రామంలో పరిశుభ్రతను పెంపొందించేందుకు పంచాయతీ ఆధ్వర్యంలో చేపడుతున్న కార్యక్రమాల్లో ప్రజలు భాగస్వాములు కావాలని సూచించారు.
ఈ కార్యక్రమంలో పంచాయతీ కార్యదర్శి సత్యనారాయణ, ఉపసర్పంచ్ రాజు, వార్డు సభ్యులు బైరి రాజు, శ్రీనివాస్, హరిబాబు తదితరులు పాల్గొన్నారు.