సెప్టెంబర్ 19న కోదాడలో మెగా జాబ్ మేళా

సెప్టెంబర్ 19న కోదాడలో మెగా జాబ్ మేళా
నిరుద్యోగ యువత ఈ అవకాశాన్ని సద్వినియోగం చేసుకోవాలి: మంత్రి ఉత్తమ్ కుమార్ రెడ్డి
కోదాడ: నిరుద్యోగ యువతకు ఉద్యోగ అవకాశాలు కల్పించడమే లక్ష్యంగా సెప్టెంబర్ 19న కోదాడలో నిర్వహించనున్న మెగా జాబ్ మేళాను యువత సద్వినియోగం చేసుకోవాలని రాష్ట్ర నీటిపారుదల, పౌర సరఫరాల శాఖ మంత్రి నలమాద ఉత్తమ్ కుమార్ రెడ్డి పిలుపునిచ్చారు.
కోదాడలో నిర్వహించనున్న మెగా జాబ్ మేళాకు సంబంధించిన పోస్టర్‌ను ఆదివారం మంత్రి ఉత్తమ్ కుమార్ రెడ్డి ఆవిష్కరించారు. ఈ సందర్భంగా ఆయన మాట్లాడుతూ.. కోదాడ నియోజకవర్గంతో పాటు సూర్యాపేట జిల్లాలోని వివిధ నియోజకవర్గాలకు చెందిన నిరుద్యోగ యువతకు ఉద్యోగ అవకాశాలు కల్పించేందుకు ఈ జాబ్ మేళాను ఏర్పాటు చేస్తున్నట్లు తెలిపారు.
ప్రైవేటు రంగంలోని వివిధ ప్రముఖ సంస్థలు ఈ జాబ్ మేళాలో పాల్గొని అర్హత కలిగిన యువతకు ఉద్యోగ అవకాశాలు కల్పించనున్నాయని తెలిపారు. విద్యార్హతలు, నైపుణ్యాలకు అనుగుణంగా ఉద్యోగాలను పొందేందుకు యువతకు ఇది మంచి వేదికగా నిలుస్తుందని మంత్రి పేర్కొన్నారు.
సూర్యాపేట జిల్లాలోని అన్ని నియోజకవర్గాల ఎమ్మెల్యేలు, కాంగ్రెస్ పార్టీ నాయకులు ప్రతి మండలంలో జాబ్ మేళాపై విస్తృతంగా ప్రచారం నిర్వహించి, నిరుద్యోగ యువతకు సమాచారం అందించాలని మంత్రి సూచించారు. గ్రామీణ ప్రాంతాల్లోని యువత కూడా పెద్ద సంఖ్యలో పాల్గొనేలా నాయకులు, కార్యకర్తలు చొరవ తీసుకోవాలని కోరారు.
యువత ఉద్యోగాల కోసం ఇతర ప్రాంతాలకు వెళ్లాల్సిన అవసరం లేకుండా స్థానికంగానే మంచి అవకాశాలను అందుబాటులోకి తీసుకురావాలనే లక్ష్యంతో ఇటువంటి కార్యక్రమాలను నిర్వహిస్తున్నామని మంత్రి తెలిపారు. అర్హత ఉన్న ప్రతి నిరుద్యోగ యువకుడు, యువతి ఈ అవకాశాన్ని వినియోగించుకుని తమ భవిష్యత్తుకు మంచి మార్గాన్ని ఏర్పరచుకోవాలని ఆయన సూచించారు.
ఈ కార్యక్రమంలో కోదాడ ఎమ్మెల్యే ఉత్తమ్ పద్మావతి రెడ్డి, జిల్లా కలెక్టర్ తేజస్ నందలాల్ పవార్, సూర్యాపేట జిల్లా ఎస్పీ, జిల్లా గ్రంథాలయ సంస్థ చైర్మన్ వంగవీటి రామారావు, టీపీసీసీ డెలిగేట్ లక్ష్మారెడ్డి, కోదాడ మున్సిపల్ చైర్మన్ కుసుమ వెంకటరత్నం బాబుతో పాటు కాంగ్రెస్ పార్టీ నాయకులు, ప్రజాప్రతినిధులు, కార్యకర్తలు పాల్గొన్నారు.
సెప్టెంబర్ 19న కోదాడలో జరిగే మెగా జాబ్ మేళాకు జిల్లాలోని నిరుద్యోగ యువత పెద్ద సంఖ్యలో హాజరై ఉద్యోగ అవకాశాలను సద్వినియోగం చేసుకోవాలని నాయకులు పిలుపునిచ్చారు.