*కిష్టాపూర్ రోడ్డులోని లేఅవుట్కు విద్యుత్ శాఖ లేఖ.. గిఫ్ట్ డీడ్ ద్వారా భూమి కేటాయించాలని సూచన* *11 కేవీ ఫీడర్పై గరిష్ఠ లోడ్.. సబ్స్టేషన్, ఫీడర్ సామర్థ్యం సరిపోదన్న అధికారులు* మేడ్చల్, నేడు న్యూస్: కిష్టాపూర్ – పూడూరు డివిజన్ పరిధిలోని రోడ్డులోని ఓ లే అవుట్కు విద్యుత్ సరఫరా విస్తరణ విషయంలో విద్యుత్ శాఖ జారీ చేసిన లేఖ చర్చనీయాంశంగా మారింది. మేడ్చల్ సబ్ డివిజన్ పరిధిలోని సర్వే నంబర్లు 505, 506లో ఉన్న ఎ.ఎస్. ఇన్ఫ్రా అండ్ డెవలపర్స్ లేఅవుట్కు విద్యుత్ సరఫరా కోసం కనీసం 2,500 చదరపు గజాల భూమిని టీఎస్ఎస్పీడీసీఎల్కు గిఫ్ట్ డీడ్ ద్వారా కేటాయించాలని అసిస్టెంట్ డివిజనల్ ఇంజినీర్ కోరారు. 2024 డిసెంబర్లో జారీ చేసిన లేఖలో, లేఅవుట్కు ఒక్కొక్కటి 10 కిలోవాట్ల సామర్థ్యం కలిగిన మూడు దశల నాన్-డొమెస్టిక్ విద్యుత్ లోడ్లతో పాటు పూర్తి ఎల్టీ నెట్వర్క్ను ఏర్పాటు చేయాల్సి ఉందని పేర్కొన్నారు. ఈ విద్యుత్ అవసరాలను ప్రస్తుత వ్యవస్థ ద్వారా నేరుగా అందించడం సాంకేతికంగా సాధ్యం కాదని అధికారులు వివరించారు. ప్రస్తుతం ఈ ప్రాంతానికి 33/11 కేవీ కిష్టాపూర్ సబ్స్టేషన్ నుంచి వచ్చే 11 కేవీ ఏజీఎల్ కిష్టాపూర్ ఫీడర్ ద్వారా విద్యుత్ సరఫరా జరుగుతోందని, లేఅవుట్ ప్రాంతం సుమారు 5 కిలోమీటర్ల దూరంలో ఉందని లేఖలో పేర్కొన్నారు. ఇప్పటికే ఈ ఫీడర్ గరిష్ఠ లోడ్కు చేరుకుందని, సబ్స్టేషన్ సామర్థ్యం కూడా అదనపు లోడ్ను భరించే స్థితిలో లేదని అధికారులు తెలిపారు. ఈ ప్రాంతంలో వేగంగా అభివృద్ధి జరుగుతున్న నేపథ్యంలో భవిష్యత్తులో మరింత విద్యుత్ లోడ్ను అందించాల్సిన అవసరం ఉంటుందని విద్యుత్ శాఖ పేర్కొంది. అందువల్ల కొత్త విద్యుత్ మౌలిక వసతుల అభివృద్ధికి లేఅవుట్లో కనీసం 2,500 చదరపు గజాల స్థలాన్ని కేటాయించడం అవసరమని అధికారులు స్పష్టం చేశారు. ఈ భూమిని టీఎస్ఎస్పీడీసీఎల్కు గిఫ్ట్ డీడ్ ద్వారా రిజిస్ట్రేషన్ చేసి అప్పగించాలని లేఖలో కోరారు. అలా భూమి అందుబాటులోకి వస్తే అవసరమైన విద్యుత్ మౌలిక వసతులను అభివృద్ధి చేసి, లేఅవుట్తో పాటు పరిసర ప్రాంతాలకు అంతరాయం లేని నాణ్యమైన విద్యుత్ సరఫరా అందించేందుకు వీలుంటుందని అధికారులు పేర్కొన్నారు. ఈ నేపథ్యంలో లేఅవుట్కు విద్యుత్ సరఫరా కోసం ప్రైవేట్ సంస్థ నుంచి ప్రభుత్వ విద్యుత్ శాఖకు భూమి కేటాయింపు కోరిన అంశం స్థానికంగా చర్చనీయాంశంగా మారింది. ఈ ప్రక్రియలో నిబంధనలు, భూమి కేటాయింపు అవసరం, విద్యుత్ మౌలిక వసతుల అభివృద్ధికి సంబంధించిన అంశాలపై స్పష్టత అవసరమని స్థానికులు అభిప్రాయపడుతున్నారు.