నంగునూరు, సెప్టెంబర్ 25:సాఫ్ట్ బాల్ క్రీడలో ప్రతిభ కనబరిచి అంతర్జాతీయ స్థాయి పోటీలకు ఎంపికైన క్రీడాకారిణి, గట్లమల్యాల ఉన్నత పాఠశాల విద్యార్థిని బానోతు ఈశ్వరిని సిద్ధిపేట జిల్లా పరిషత్ సీఈవో, ఇంఛార్జి జిల్లా విద్యాధికారి రమేశ్ అభినందించారు. పాఠశాల ప్రధానోపాధ్యాయుడు మాదాసి రమేశ్, వ్యాయామ ఉపాధ్యాయుడు దర్శనాల రాజ్ కుమార్, గట్లమల్యాల బాలికల వసతి గృహ సంక్షేమ అధికారి మాధవీలతతో పాటు గట్లమల్యాల పాఠశాల ఉపాధ్యాయ బృందంతో కలిసి ఈశ్వరి శుక్రవారం సాయంత్రం డీఈవోను కలిసింది. చైనాలో అక్టోబర్ 12వ తేదీ నుంచి 18వ తేదీ వరకు నిర్వహించనున్న ఏషియన్ సబ్ జూనియర్ గేమ్స్లో భారతదేశం తరఫున పాల్గొననున్న ఈశ్వరికి శుభాకాంక్షలు తెలిపారు. ఈ సందర్భంగా జిల్లా విద్యాశాఖ అధికారి రమేశ్ మాట్లాడుతూ.. గ్రామీణ ప్రాంతం నుంచి అంతర్జాతీయ స్థాయికి ఎదిగి, దేశానికి ప్రాతినిధ్యం వహించడం ఎంతో గర్వకారణమన్నారు. క్రీడల్లో విద్యార్థులు రాణించేందుకు పాఠశాల స్థాయి నుంచే ప్రోత్సాహం, సరైన శిక్షణ అందించాల్సిన అవసరం ఉందన్నారు. ఈశ్వరి కృషి, పట్టుదల, ప్రతిభ ఇతర విద్యార్థులకు స్ఫూర్తిగా నిలుస్తాయని పేర్కొన్నారు. ఈ సందర్భంగా పాఠశాల హెచ్ఎం మాదాసి రమేశ్, వ్యాయామ ఉపాధ్యాయుడు దర్శనాల రాజ్ కుమార్, హెచ్డబ్ల్యూఓ మాధవీలతతో పాటు పాఠశాల ఉపాధ్యాయ బృందం ఈశ్వరిని అభినందించారు. అంతర్జాతీయ వేదికపై తన ప్రతిభను చాటుకుని, దేశానికి మంచి పేరు తీసుకురావాలని ఆకాంక్షించారు. భారత జెర్సీతో అంతర్జాతీయ క్రీడా వేదికపై అడుగుపెడుతున్న బానోతు ఈశ్వరికి పాఠశాల ఉపాధ్యాయులు, విద్యార్థులు క్రీడాభిమానులు ఘనంగా శుభాకాంక్షలు తెలిపారు.