లిఫ్ట్ దగ్గర చెత్త – కలెక్టర్ కార్యాలయంలోనే పరిశుభ్రత గల్లంతా?
ప్రజావాణి / రాజన్న సిరిసిల్ల
రాజన్న సిరిసిల్ల జిల్లా కలెక్టర్ కార్యాలయంలోనే పరిశుభ్రతకు తూట్లు పొడుస్తున్న పరిస్థితి కనిపిస్తోంది. కార్యాలయంలోని లిఫ్ట్ సమీపంలో చెత్త పేరుకుపోవడం వల్ల అక్కడికి వచ్చే ప్రజలు తీవ్ర అసౌకర్యానికి గురవుతున్నారు. ప్రభుత్వ కార్యాలయం అంటే క్రమశిక్షణ, పరిశుభ్రతకు ప్రతీకగా ఉండాల్సిన ప్రదేశంలోనే చెత్త కుప్పలు కనిపించడం ఆశ్చర్యాన్ని కలిగిస్తోంది.
ప్రతిరోజూ తమ సమస్యల పరిష్కారం కోసం దూర ప్రాంతాల నుంచి వచ్చే ప్రజలు, ఉద్యోగులు ఈ చెత్త దుర్వాసనతో ఇబ్బందులు పడుతున్నారు. లిఫ్ట్ వద్ద చెత్త పేరుకుపోవడంతో అక్కడి వాతావరణం అసహ్యకరంగా మారిందని పలువురు ఆగ్రహం వ్యక్తం చేస్తున్నారు.
“ప్రజలకు సేవ చేయాల్సిన కార్యాలయంలోనే ఇలా చెత్త పేరుకుపోతే, సాధారణ ప్రాంతాల్లో పరిస్థితి ఎలా ఉంటుందో అర్థం చేసుకోవచ్చు” అని కొందరు వ్యాఖ్యానిస్తున్నారు. అధికారులు కళ్లముందే చెత్త పేరుకుపోతున్నా పట్టించుకోకపోవడం నిర్లక్ష్యానికి నిదర్శనమని ప్రజలు అంటున్నారు.
ఇంత పెద్ద ప్రభుత్వ కార్యాలయంలో పరిశుభ్రతపై ఇంత నిర్లక్ష్యం ఉండటం బాధాకరమని, వెంటనే స్పందించి చెత్తను తొలగించి శాశ్వతంగా పరిశుభ్రత చర్యలు చేపట్టాలని ప్రజలు డిమాండ్ చేస్తున్నారు. ఇప్పటికైనా ఉన్నతాధికారులు స్పందించి బాధ్యులపై చర్యలు తీసుకుంటారా…? లేక ఈ చెత్త కుప్పలే కార్యాలయ నిర్వహణకు ప్రతిబింబమా అన్న ప్రశ్నలు వినిపిస్తున్నాయి.